Ministria e Shëndetësisë dhe Mirëqenies Sociale ka hapur thirrjen për dhënien e 70 kredive me interes 0% për mjekët dhe infermierët që synojnë të blejnë një banesë.
Aplikimet do të hapen më 27 gusht dhe do të qëndrojnë të vlefshme deri më 25 shtator 2026. Të interesuarit duhet të aplikojnë përmes portalit e-Albania.
Për të përfituar nga programi, aplikanti duhet të jetë i punësuar në administratën publike, sipas përcaktimeve të ligjit “Për strehimin social”.
Gjithashtu, ai nuk duhet të zotërojë një banesë apo të ketë një të tillë në proces legalizimi. Përjashtim bëjnë rastet kur banesa ekzistuese është nën normat e përcaktuara të strehimit.
Një tjetër kriter është që aplikanti të mos zotërojë pasuri të paluajtshme apo të luajtshme me vlerë më të madhe se gjysma e çmimit të banesës që do të blihet përmes kredisë së lehtësuar.
Nga skema përjashtohen edhe mjekët dhe infermierët që janë përfitues të programeve të tjera të strehimit social.
Kredia me interes zero synon të mbështesë profesionistët e shëndetësisë në përballimin e kostove për blerjen e banesës, ndërsa fondi mbulon vetëm 70 përfitues.
