Konflikti mes biznesmenëve Behgjet Pacolli dhe Valon Ademi për kontrollin dhe vijimin e punimeve në Aeroportin e Vlorës po hyn në një fazë edhe më të tensionuar, ndërsa situata e krijuar rrezikon të shtyjë më tej hapjen e aeroportit që konsiderohet një nga projektet më të rëndësishme për turizmin shqiptar.
Përplasja mes palëve u reflektua edhe ditën e sotme në kantierin e aeroportit, ku punonjësit e kompanisë Mabco dhe nënkontraktorët e saj nuk u lejuan të hynin në ambientet e aeroportit.
Punonjësit janë njoftuar që mbrëmjen e kaluar të mos paraqiteshin në punë, por për shkak të mungesës së një komunikimi zyrtar, ata janë paraqitur normalisht në kantier gjatë mëngjesit. Megjithatë, hyrja e tyre është ndaluar.
View this post on Instagram
Bëhet fjalë për punonjës që operojnë në terminal, në ambientet e jashtme të aeroportit dhe në sektorin zjarrfikës.
Në qendër të konfliktit është shoqëria koncesionare VIA, e cila tashmë kontrollohet nga 2A Group e Valon Ademit, pas ngrirjes nga gjykata të kuotave të Mabco-s së Behgjet Pacollit, përfshirë të drejtën e votës.
Sipas strukturës së deritanishme të projektit, punimet në aeroport ishin ndarë me nënkontraktim mes dy aksionerëve. 2A Group kishte pjesën e pistës, ndërsa Mabco ishte angazhuar në ndërtimin e terminalit dhe punimeve të tjera.
Mabco pretendon se administratori i ri i VIA-s, Vegim Hoxha, i ka hequr në mënyrë të padrejtë nënkontraktimin kompanisë dhe ka bllokuar hyrjen e punonjësve në kantier.
Në reagimin e saj zyrtar, Mabco deklaron se nuk e njeh vendimin për zgjidhjen e kontratës dhe e konsideron atë të paligjshëm. Kompania thotë se çështja ndodhet në gjykatë dhe se konfliktet mes ortakëve duhet të zgjidhen përmes institucioneve ligjore dhe jo përmes bllokimit të punimeve në aeroport.
Nga ana tjetër, 2A Group pretendon se Mabco ka shkaktuar vonesa në ndërtimin e terminalit dhe kjo ka sjellë pengesa në përfundimin e projektit.
Ndërkohë, situata po ngre pikëpyetje serioze për fatin e aeroportit të Vlorës dhe ndikimin që mund të ketë kjo për turizmin në jug të vendit.
Aeroporti ishte parashikuar të hynte në funksion gjatë këtij sezoni dhe shihej si hallka kryesore që do të mbështeste strategjinë për zhvillimin e turizmit gjatë gjithë vitit në jugun e Shqipërisë.
Në vitet e fundit janë ndërtuar dhjetëra struktura akomoduese moderne në zonat e Palasës, Dhërmiut, Jalës dhe përgjatë rivierës, me idenë që të funksionojnë jo vetëm gjatë verës, por në të gjitha stinët.
Në të njëjtën logjikë u ndërtua edhe Tuneli i Llogarasë, i cili uli ndjeshëm kohën e udhëtimit drejt jugut dhe synonte ta kthente rivierën shqiptare në një destinacion më të aksesueshëm gjatë gjithë vitit.
Në këtë zinxhir investimesh, Aeroporti i Vlorës konsiderohej elementi kyç që do të sillte turistë direkt në jug të vendit pa kaluar nga Tirana.
Pikërisht për këtë arsye, mosfunksionimi i aeroportit dhe shtyrja e hapjes së tij po shihet si një goditje për zhvillimin turistik të zonës.
Ndërsa palët vijojnë betejën në gjykatë për kontrollin e projektit dhe përgjegjësitë për vonesat, shumë zëra po kërkojnë që konflikti të mos pengojë funksionimin e një infrastrukture që konsiderohet një aset strategjik dhe publik për ekonominë shqiptare. /skyweb.al
