Shqiptarët po zgjedhin gjithnjë e më shumë automjetet hibride dhe elektrike. Të dhënat e publikuara nga Drejtoria e Përgjithshme e Shërbimeve të Transportit Rrugor tregojnë se tregu i makinave të reja në vend po ndryshon me ritme të shpejta.
Sipas statistikave të DPSHTRR për periudhën janar–prill 2026, automjetet Electric Hybrid Plug-in me 0 kilometra përbëjnë 81.2% të të gjitha mjeteve të reja të regjistruara gjatë katër muajve të parë të vitit.
Kjo do të thotë se më shumë se 8 në 10 makina të reja të regjistruara në Shqipëri janë hibride ose elektrike.
Të dhënat tregojnë gjithashtu një rritje të fortë krahasuar me të njëjtën periudhë të vitit të kaluar. Regjistrimet e mjeteve Electric Hybrid Plug-in janë rritur me 26.7% në raport me janar–prill 2025.
Sipas ekspertëve të tregut, qytetarët po orientohen drejt këtyre automjeteve për disa arsye kryesore. Një prej tyre është konsumi më i ulët i karburantit dhe kostot më të reduktuara të përdorimit në afat të gjatë. Një tjetër faktor lidhet me interesin në rritje për automjete më pak ndotëse dhe më moderne.
Rritja e mjeteve hibride dhe elektrike shihet edhe si tregues i ndryshimit gradual të flotës automobilistike në Shqipëri, e cila për vite me radhë është dominuar nga automjetet me naftë.
Ky trend po afrohet gjithnjë e më shumë me zhvillimet në tregun europian, ku automjetet me emetime të ulëta po fitojnë terren nga viti në vit.
Megjithatë, sfidat mbeten të lidhura me infrastrukturën e karikimit për automjetet elektrike, numrin e kufizuar të pikave të karikimit dhe kostot ende të larta të disa modeleve të reja në treg. /skyweb.al
