Përballë destinacioneve klasike evropiane, media spanjolle “El País” rekomandon Shqipërinë për turistët që kërkojnë pushime më të lira dhe ku nuk ka turizëm masiv.
I njohur si vendi i shqiponjave, Shqipëria tashmë po bëhet gjithnjë e më në modë. Jo më kot, në vitin 2025 ajo priti 12 milionë turistë, një shifër që është pothuajse pesë herë më e madhe se popullsia e saj, shkruhet në artikull.
El Pais vijon më tej se Tirana i shtohet listës së atyre kryeqyteteve që nuk do të ishin në guidat e udhëtimit po të mos ishte për faktin se aty ndodhet aeroporti, por meqë je aty, ia vlen t’i marrësh pulsin qytetit duke shëtitur në sheshin Skënderbej, sheshi kryesor i qytetit, dhe të përfitosh nga rasti për të vizituar xhaminë Et’hem Bej, Muzeun Kombëtar ose Bibliotekën Kombëtare. Megjithatë, nëse ka një vend që vërtet ia vlen shumë, ai është Bunk’Art 2, një strehë antinukleare e shndërruar në muze për të kujtuar periudhën e diktaturës së Enver Hoxhës.
Shqipëria ka gjithashtu thesare arkeologjike si Butrinti, me agoranë, banjat termale dhe teatrin romak apo qytete historike jashtëzakonisht të bukura si Berati dhe Gjirokastra. Për ata që duan të zgjedhin vende më të izoluara, Thethi është pika hyrëse drejt Alpeve shqiptare dhe fshatit piktoresk të Valbonës. Megjithatë, pa dyshim, ajo që po tërheq më shumë turistë në vend janë plazhet. E ashtuquajtura Riviera shqiptare, në jugperëndim dhe e lagur nga Deti Jon, shtrihet mes Vlorës dhe Sarandës me ujëra të kristalta, bukuri të jashtëzakonshme natyrore dhe çmime të përballueshme. Në të spikasin Ksamil, gjiri i Dafines dhe vizita në Syrin e Kaltër, një burim uji që, siç e tregon edhe emri, ka një ngjyrë blu mbresëlënëse dhe një thellësi ende të papërcaktuar. /skyweb.al
