Ish-drejtoresha e AKSHI-t, Mirlinda Karçanaj, ka zgjedhur të mos japë asnjë koment pas daljes nga ambientet e SPAK, edhe pse u pyet disa herë nga gazetarët për hetimet ndaj saj dhe çështjen e AKSHI-t.
Karçanaj qëndroi për rreth 30 minuta në Prokurorinë e Posaçme, në zbatim të masës së sigurisë “detyrim paraqitje”, të vendosur ndaj saj nga Gjykata e Lartë.
View this post on Instagram
Në dalje, gazetarët Klodiana Lala dhe Glidona Daci iu drejtuan me pyetjen: “Ke thënë që gazetarët nuk të kanë pyetur ndonjëherë për çështjen e AKSHI-t, tani na thuaj çfarë ke për të thënë për çështjen AKSHI”.
Megjithatë, ish-drejtoresha e AKSHI-t nuk dha asnjë përgjigje, duke kaluar në heshtje mes mikrofonëve të mediave.
Në një moment, avokatja e saj shtyu mikrofonët e gazetarëve, ndërsa deklaroi: “Kur të dojë ajo do të flasë”.
Heshtja e Karçanajt vjen vetëm pak kohë pasi ajo deklaroi në një intervistë televizive se gazetarët nuk e kishin pyetur ndonjëherë për çështjen e AKSHI-t dhe akuzat ndaj saj.
Pak ditë më parë, Gjykata e Lartë vendosi të lehtësojë masën e sigurisë ndaj ish-drejtoreshës së Agjencisë Kombëtare të Shoqërisë së Informacionit, duke zëvendësuar “arrestin në shtëpi” me “ndalim daljeje jashtë shtetit” dhe “detyrim paraqitje”.
SPAK po heton Karçanajn për dyshime mbi shkelje të procedurave në tenderë publikë dhe përfshirje në grup të strukturuar kriminal.
Sipas akuzave të Prokurorisë së Posaçme, ndaj saj rëndojnë veprat penale “Shkelje e barazisë së pjesëmarrësve në tendera apo ankande publike”, kryer në kuadër të grupit të strukturuar kriminal, si dhe “Kryerje e veprave penale nga organizata kriminale dhe grupi i strukturuar kriminal”.
Në të njëjtën dosje hetohen edhe ish-zv.drejtoresha e AKSHI-t, Hava Delibashi, si dhe zv.drejtori i Policisë së Tiranës, Erjon Ismaili, i cili është pezulluar nga detyra. /skyweb.al
