Shifrat zyrtare të publikuara nga INSTAT tregojnë se Shqipëria ka vijuar trendin pozitiv të rritjes së turistëve edhe në fillim të vitit 2025.
Vetëm në muajin prill kanë hyrë në vend rreth 820 mijë vizitorë të huaj, duke shënuar një rritje prej 6 për qind krahasuar me prillin e vitit të kaluar.
INSTAT raporton rritje të fortë të numrit të turistëve në shkurt 2025, detajet
Në janar 2025, numri total i hyrjeve ishte 1.158 milionë, me një rritje prej 12.4 për qind në krahasim me janarin 2024, ndërsa vizitorët e huaj arritën në 560 mijë, ose 14.5 për qind më shumë se një vit më parë.
Vlen të theksohet gjithashtu zgjerimi i tregjeve të reja turistike, ku vihet re rritje e ndjeshme e vizitorëve nga Finlanda (+350%), Izraeli (+276%) dhe India (+103%).
Në total, për vitin 2024 Shqipëria ka pritur rreth 11.7 milionë turistë, një shifër rekord për një vend me rreth 2.4 milionë banorë, duke konfirmuar pozicionin e saj gjithnjë e më të fortë në hartën e destinacioneve turistike të Europës.
TIA kryeson në Europë për destinacionet
Në këtë sfond të rritjes së vazhdueshme të turizmit, Tirana International Airport (TIA) ka shënuar një rritje rekord prej 56 për qind të lidhjeve ajrore në vitin 2025, krahasuar me vitin 2019, sipas të dhënave të fundit nga ACI Europe.
Kjo e vendos Shqipërinë shumë përpara mesatares europiane, e cila aktualisht regjistron ende një rënie prej 9 për qind në krahasim me periudhën para pandemisë.
TIA jo vetëm që kryeson në rajon duke lënë pas Kosovën, Serbinë dhe Maqedoninë e Veriut, por pozicionohet tashmë si një nga aeroportet më dinamike në Europë për zhvillimin e rrjetit të linjave ajrore.
Për të ilustruar këtë trend:
- Gjatë vitit 2024, TIA ka përpunuar 10.7 milionë pasagjerë, një rritje prej 48 për qind krahasuar me 2023 dhe gati trefishim në raport me 3.3 milionë pasagjerë në vitin 2019.
- Aeroporti ka avancuar edhe në drejtim të standardeve mjedisore, duke marrë certifikimin Level 3 Optimization në kuadër të Airport Carbon Accreditation dhe duke investuar mbi 5 milionë euro në energji diellore, ndriçim LED dhe elektrifikim të shërbimeve tokësore.
/skyweb.al
