Që prej datës 15 maj 2026 kanë nisur zyrtarisht aplikimet për lidhjen e Marrëveshjes së Paqes Fiskale dhe rideklarimin e pasqyrave financiare. Afati i fundit për paraqitjen e aplikimeve është data 5 qershor 2026.
Sipas njoftimit të Administratës Tatimore, aplikimi kryhet online në sistemin “e-Filing”, përmes shërbimit “Aplikim për Marrëveshjen e Paqes Fiskale”.
Të drejtën për të aplikuar e kanë tatimpaguesit që janë subjekt i Tatimit mbi të Ardhurat e Korporatave ose Tatimit mbi të Ardhurat Personale nga Biznesi dhe që plotësojnë disa kushte ligjore, mes të cilave:
- të ushtrojnë aktivitet ekonomik në Shqipëri;
- të kenë realizuar mbi 14 milionë lekë të ardhura bruto në vitin paraardhës;
- të mos kenë detyrime tatimore të papaguara ose të padeklaruara;
- të mos jenë në proces ankimi administrativ;
- të mos jenë subjekt hetimesh apo procedimesh penale në fushën tatimore;
- të mos jenë dënuar për mashtrim tatimor, pastrim parash apo fshehje të ardhurash;
- të mos realizojnë projekte koncesionare.
Për aplikimin, bizneset duhet të plotësojnë formularin online dhe të ngarkojnë dokumentacionin përkatës, përfshirë:
- formularin e aplikimit;
- vërtetim nga Prokuroria që subjekti, administratorët dhe pronarët përfitues nuk janë në procedim penal për vepra tatimore;
- dëshmi penaliteti që vërteton mungesën e dënimeve për mashtrim tatimor ose pastrim parash;
- vërtetim nga Drejtoria e Apelimit Tatimor që nuk janë në proces ankimi administrativ;
- vetëdeklarim që nuk realizojnë projekte koncesionare;
- vetëdeklarim se nuk kanë dijeni për procedime penale në fushën tatimore.
Kërkesa dorëzohet në rubrikën “Çështjet e mia” – “Pyetje e përgjithshme”, duke vendosur titullin “Aplikim për Marrëveshjen e Paqes Fiskale”.
Administrata Tatimore bën me dije se përgjigjja për pranimin ose refuzimin e aplikimit do t’u komunikohet tatimpaguesve elektronikisht brenda 5 ditëve kalendarike, por jo më vonë se data 10 qershor 2026.
Pas marrjes së vendimit, tatimpaguesit duhet të dorëzojnë dokumentin e nënshkruar pranë Drejtorisë Rajonale Tatimore përkatëse brenda 5 ditëve, por jo më vonë se 15 qershor 2026.
Ndërkohë, subjektet që do të kryejnë rideklarim të pasqyrave financiare duhet që deri më 30 qershor 2026 të:
- paguajnë detyrimet tatimore për vitet e korrigjuara;
- dorëzojnë formularin për rideklarimin e elementeve të aktiveve, detyrimeve ose kapitaleve;
- paraqesin pasqyrat financiare të rideklaruara;
- japin sqarimet e nevojshme mbi ndryshimet e reflektuara në pasqyrat financiare.
Administrata Tatimore u bën thirrje të gjithë tatimpaguesve që plotësojnë kriteret ligjore të aplikojnë brenda afatit të përcaktuar, pasi aplikimet pas datës 5 qershor 2026 nuk do të pranohen.
/skyweb.al
