Gjykata e Lartë ka rrëzuar kërkesën e biznesmenit Valon Ademi dhe kompanisë së tij për administrimin e Aeroportit të Vlorës, duke i hapur rrugë rikthimit në projekt të kompanisë së Behgjet Pacollit.
Me vendimin e marrë këtë të martë, Gjykata e Lartë ndryshoi dy vendimet e mëparshme të Gjykatës së Shkallës së Parë dhe të Apelit në Tiranë, duke rrëzuar masën e sigurimit të padisë të kërkuar nga shoqëritë “Vlora International Airport” dhe “ZA Group”.
Vendimi pritet të ndikojë drejtpërdrejt në administrimin dhe vendimmarrjen për projektin e Aeroportit të Vlorës, i cili prej muajsh është përfshirë nga konflikte të forta mes ortakëve dhe procese gjyqësore.
Më herët, Gjykata e Apelit kishte lënë në fuqi vendimin që i jepte Valon Ademit të drejtën për administrimin e aeroportit, ndërsa kompania e Behgjet Pacollit mbetej jashtë vendimmarrjes.
Përplasja mes palëve nuk mbeti vetëm në gjykata. Ditët e fundit tensionet u zhvendosën edhe në kantierin e punimeve të aeroportit, ku u raportuan përplasje mes punonjësve të kompanisë së Pacollit dhe përfaqësuesve të kompanisë së Ademit.
Në vendimin e saj, Gjykata e Lartë shprehet:
“Ndryshimin e vendimit nr. 17959 Akti, datë 23.12.2025 të Gjykatës së Shkallës së Parë të Juridiksionit të Përgjithshëm Tiranë dhe vendimit nr. 185 (30-2026-1569), datë 19.02.2026 të Gjykatës së Apelit të Juridiksionit të Përgjithshëm Tiranë dhe rrëzimin e kërkesës së paditësve “Vlora International Airport” SHPK dhe “ZA Group” për marrjen e masës së sigurimit të padisë.” /skyweb.al
