Presidenti i Republikës, Bajram Begaj, ka përshëndetur zhvillimin e Konferencës së 8-të Ndërqeveritare Shqipëri – Bashkimi Evropian, duke e cilësuar atë si një tjetër moment historik në rrugëtimin evropian të vendit dhe si hap që hap zyrtarisht fazën e mbylljes së negociatave për anëtarësimin e Shqipërisë në BE.
Në një mesazh publik, Kreu i Shtetit theksoi se integrimi evropian mbetet një projekt kombëtar dhe aspiratë e brezave të shqiptarëve për një Shqipëri më demokratike, më të zhvilluar dhe më dinjitoze në familjen evropiane.
“Sot, Shqipëria hodhi një tjetër hap të rëndësishëm drejt familjes evropiane. Konferenca e 8-të Ndërqeveritare Shqipëri-BE është një moment historik në rrugëtimin e pakthyeshëm evropian të Shqipërisë”, shprehet Presidenti Begaj.
Ai uroi qytetarët shqiptarë për këtë arritje, ndërsa nënvizoi se procesi drejt anëtarësimit të plotë në Bashkimin Evropian kërkon më shumë përgjegjësi dhe përkushtim.
“Integrimi evropian është projekt kombëtar, është aspirata e brezave të shqiptarëve për një Shqipëri më demokratike, më të drejtë, më të zhvilluar dhe më dinjitoze në familjen evropiane. Urime Shqipërisë dhe të gjithë qytetarëve shqiptarë për këtë arritje të rëndësishme.
Rruga vazhdon me më shumë besim, përgjegjësi dhe përkushtim”, thuhet në mesazhin e Presidentit të Republikës.
