Lëshimi i faturave fiktive për punë të pabëra, me qëllimin e vetëm për të transferuar para të siguruara nga tenderët korruptivë të AKSHI-t, rezulton të ketë qenë një nga praktikat më të përdorura nga aktorët e përfshirë në dosjen e SPAK-ut për këtë institucion.
Sipas të dhënave të dosjes hetimore, një nga rastet që ka ngritur dyshime lidhet me kompaninë “EA Solution” të Ergys Agasit, e cila në një periudhë prej vetëm 10 muajsh ka faturuar rreth 2.3 milionë euro shërbime ndaj një kompanie tjetër, ndonëse kishte vetëm katër punonjës bashkë me administratoren Ina Ciko.
Ligjërisht, faturat dhe dokumentacioni rezultojnë të rregullta, por pikërisht këtu lindin dyshimet për transaksione fiktive dhe qarkullim të parave me origjinë nga tenderë të dyshimtë të AKSHI-t. Dyshimet shtohen edhe më shumë për shkak të raportit mes volumit të faturimeve dhe numrit tepër të kufizuar të punonjësve.
“Zakonisht kompanitë që qarkullojnë vlera shumë të mëdha parash me numër të kufizuar punonjësish janë ato kompani të cilat ofrojnë një shërbim që ka shumë vlerë ose punonjësit i ka shumë të kualifikuar dhe ky punonjës prodhon shumë volum pune dhe rrjedhimisht ti si kompani mundesh që të gjenerosh fatura me vlera të mëdha. Unë di rastin e një kompanie që është pjesë e hetimit nga SPAK-u, e cila ka bashkë me administratorin 4 punonjës. Për 10 muaj ka faturuar disa milionë euro shërbime tek një kompani tjetër.
Tani çdo biznesmen i ndershëm në këtë vend e di që me 4 punonjës dhe me një kosto totale prej jo më shumë se 90 mijë euro në 10 muaj, është e pamundur që ti të krijosh aq shumë volum pune dhe të kesh aq shumë punonjës të kualifikuar për të gjeneruar një vlerë pune kaq të madhe, që është disa milionë euro”, u shpreh në emisionin “Inside Story” drejtori i skyweb.al, Emirjon Senja duke iu referuar dosjes së SPAK në lidhje me kompaninë EA Solution të Ergys Agasit.
Sipas analizës së bërë mbi të dhënat financiare dhe faturimet, dyshimet kryesore të hetimit lidhen me faktin nëse këto fatura përktheheshin realisht në punë konkrete apo shërbenin vetëm si mekanizëm për transferimin dhe pastrimin e parave të përfituara nga tenderët e dyshuar korruptivë të AKSHI-t.
Në raste të tilla, ekspertët e ekonomisë dhe hetimit financiar theksojnë se kompanitë me pak punonjës dhe me volum shumë të lartë faturimesh konsiderohen automatikisht subjekte me risk të lartë për hetime të mëtejshme financiare dhe tatimore, sidomos kur aktiviteti i deklaruar nuk justifikon vlerat e qarkulluara.
