Policia e Shtetit ka hequr licencën për dy subjekte private të sigurisë fizike, pas ngjarjeve të ndodhura gjatë tubimit të zhvilluar më 30 maj 2026 në Portonovë, Zvërnec, ku një protestues u godit dhe u tërhoq me forcë brenda rrethimit të pronës.
Sipas Drejtorisë së Përgjithshme të Policisë së Shtetit, licenca u është hequr subjekteve ShPSF “Myrto Security 1.3A” dhe ShPSF “Major Security”, pas hetimeve administrative të kryera nga Drejtoria e Standardeve Profesionale dhe Departamenti për Sigurinë Publike.
Hetimet janë përqendruar te veprimet dhe mosveprimet e punonjësve të sigurisë gjatë tubimit, si dhe te ligjshmëria e subjekteve private të kontraktuara nga pronari për ruajtjen dhe sigurinë fizike të pronës në Portonovë.
Nga verifikimet, Policia thotë se ShPSF “Myrto Security 1.3A” nuk kishte marrë masat e nevojshme për sigurinë e objektit dhe nuk kishte zbatuar rregullat për hyrjen dhe daljen e personave apo mjeteve në objekt. Ky subjekt nuk administronte listën e personave dhe mjeteve që lejoheshin të hynin në pronë.
Për shkak të këtyre shkeljeve, më 30 maj, në brendësi të rrethimit janë lejuar të hyjnë persona të paidentifikuar dhe të panjohur nga personeli i shërbimit. Sipas Policisë, këta persona kanë ndërhyrë pa asnjë atribut ligjor gjatë tubimit, kanë goditur dhe tërhequr me forcë një protestues, duke i shkaktuar dëmtime trupore.
Policia bën të ditur gjithashtu se nga brenda rrethimit të pronës është reaguar ndaj protestuesve me gurë dhe sende të tjera. Punonjësit e ShPSF “Myrto Security 1.3A” nuk kanë kryer asnjë veprim për parandalimin e dhunës apo largimin e personave që kryen veprimet e paligjshme.
Shkelje janë konstatuar edhe te ShPSF “Major Security”.
Sipas Policisë, një punonjës i licencuar i këtij subjekti, së bashku me dy persona të tjerë, ka kryer veprime arbitrare në tejkalim të kompetencave.
Ata kanë goditur me grusht një nga protestuesit, e kanë marrë me forcë dhe e kanë futur brenda rrethimit, duke i shkaktuar dëmtime trupore.
Nga verifikimet rezultoi se dy personat e tjerë të proceduar penalisht nuk figuronin të regjistruar apo të licencuar nga ShPSF “Major Security”.
Në përfundim të hetimeve administrative, Drejtori i Përgjithshëm i Policisë së Shtetit vendosi heqjen e licencës për të dy subjektet, bazuar në ligjin “Për shërbimin privat të sigurisë fizike”.
Policia njofton se hetimet penale dhe administrative për ngjarjen vijojnë.
