Kryeministri Edi Rama ka reaguar për ngjarjet e ndodhura në Zvërnec, ku një protestues u tërhoq zvarrë nga persona të sigurisë private gjatë kundërshtimeve për projektin turistik që po zhvillohet në zonë.
Në një deklaratë publike, Rama tha se e kupton plotësisht zemërimin e qytetarëve që reaguan pas publikimit të pamjeve të dhunës dhe pranoi se edhe vetë do të ishte revoltuar nëse do të ishte në vendin e tyre.
“Dua ta nis me një mesazh të drejtpërdrejtë për ata që janë revoltuar dhe janë rreshtuar edhe kundër meje personalisht, pasi panë aktin e neveritshëm të tërheqjes zvarrë të një prej protestuesve në Zvërnec. Ju kam dëgjuar, ju kam lexuar dhe ju kuptoj shumë mirë. Madje ju siguroj që në vendin tuaj edhe unë njësoj do të revoltohesha dhe do të rreshtohesha kundër qeverisë dhe kundër kryeministrit”, tha Rama.
Kreu i qeverisë e cilësoi të papranueshme sjelljen e personave të sigurisë private, duke theksuar se Policia e Shtetit nuk duhej ta relativizonte ngjarjen, por të ndërhynte menjëherë ndaj autorëve.
“Do të më dukej e tmerrshme që disa roje private sigurie, në sytë e Policisë së Shtetit, të ulërinin si kafshë dhe të merrnin si kafshë një njeri në të drejtën e vet, ta tërhiqnin zvarrë në plazhin e rrethuar dhe pastaj policia të thoshte se personi u fut vetë në zonën private, ndërkohë që duhet t’i kishte arrestuar në vend ata që morën zvarrë protestuesin”, deklaroi ai.
Rama u ndal edhe te pretendimet që kanë qarkulluar lidhur me projektin në Zvërnec, duke thënë se qytetarëve u janë servirur informacione të pavërteta për pronësinë e tokës dhe qëllimin e investimit.
Sipas tij, janë përhapur pretendime se toka po u falej investitorëve të huaj, se projekti lidhej me sjelljen e palestinezëve në zonë apo se pas investimit fshiheshin interesa ruse dhe pastrim parash.
“Do kisha bërë edhe më keq se ju po të më thoshin se ajo tokë është e shtetit dhe se shteti po ua fal të huajve. Madje kam vënë re se është përhapur me shumë helm edhe legjenda se shteti po ua fal atë tokë izraelitëve për të sjellë palestinezët në Zvërnec. Po të më thoshin se aty janë futur ca rusë që në bashkëpunim me oligarkët shqiptarë po rrafshojnë zonën e mbrojtur dhe do të ndërtojnë pallate. Po të më thoshin që aty do të pastroheshin paratë e mafies ndërkombëtare dhe të tjera nga ato që ju kanë thënë dhe që më pas i keni shpërndarë”, u shpreh kryeministri.
Deklarata e Ramës vjen në një kohë kur ngjarjet në Zvërnec kanë shkaktuar reagime të forta publike, ndërsa Policia e Shtetit ka hequr licencat e dy kompanive private të sigurisë të përfshira në menaxhimin e objektit ku ndodhi incidenti. Paralelisht, SPAK po zhvillon hetime për çështje që lidhen me pronat në këtë zonë. /skyweb.al
