Projekti turistik në Zvërnec ka sjellë qëndrime të reja politike nga kryeministri Edi Rama dhe kryetari i Partisë Demokratike, Sali Berisha, pas debatit publik të krijuar për pronat, investitorët dhe dhunën ndaj protestuesve në zonë.
Rama, gjatë fjalës para Grupit Parlamentar të Partisë Socialiste, tha se projekti në Zvërnec është kthyer në një “kurth për të ardhmen e Shqipërisë”, për shkak të akuzave dhe pretendimeve që sipas tij janë ngritur mbi investimin. Ai e krahasoi situatën me filmin “Wag the Dog”, ku përmes mediave fabrikohet një luftë e trilluar mes Amerikës dhe Shqipërisë.
Sipas kryeministrit, projekti ka nisur si interesim i investitorëve në vitin 2023, bashkë me ishullin e Sazanit. Ai tha se qeveria ka mbajtur qëndrimin se Sazani është tokë publike dhe nuk mund të shitet, ndërsa shteti shqiptar duhet të jetë ortak në zhvillimin e tij.
“Qëndrimi ynë ka qenë se Sazani është tokë publike. Mund të punojmë, por ajo tokë nuk shitet. I kemi bërë me dije se duam që shteti shqiptar të jetë ortak”, tha Rama.
Ndryshe nga Sazani, sipas tij, në zonën e Zvërnecit nuk bëhet fjalë për tokë shtetërore, por për prona private të regjistruara prej vitesh në hipotekë.
“Për Zvërnecin duhet të shihni pronat dhe pronarët. Nuk ka tokë shtet. Copëzat e shtetit janë totalisht të papërfillshme në atë pjesë aty”, u shpreh kryeministri.
Rama tha se pas projektit qëndron Jared Kushner, emër i njohur ndërkombëtarisht, i cili sipas tij e ka promovuar publikisht investimin.
“Ju e dini mirë kush janë të interesuarit, se e di gjithë bota. Bota mbarë flet për këtë projekt prej Jared Kushner, që e ka promovuar këtë projekt”, tha Rama.
Kryeministri theksoi se investitorët kanë angazhuar ekspertizë ndërkombëtare në arkitekturë, inxhinieri dhe juridiksion, ndërsa qeveria shqiptare ka mbrojtur interesin publik gjatë procedurës.
“Ne si shtet kemi mbrojtur interesin tuaj dhe e kemi bërë procedurën profesionalisht dhe patriotikisht. Projekti i vjetër është rrëzuar nga ne. Kemi standarde të larta dhe i duam ato”, deklaroi ai.
Rama shtoi se qeveria nuk është përfshirë në negociatat apo transaksionet mes pronarëve privatë dhe investitorëve për tokat në Zvërnec, por është përqendruar te Sazani, ku sipas tij ende nuk janë mbyllur negociatat për shkak të kërkesës që shteti shqiptar të ketë pjesën e vet.
Ai mbrojti edhe rrethimin e pronës, duke thënë se është bërë në bazë të lejes së zhvillimit dhe se çdo pronar ka të drejtë të rrethojë pronën pas marrjes së kësaj lejeje.
Ndërkohë, kryetari i Partisë Demokratike, Sali Berisha, i pyetur nga gazetarët para SPAK-ut për projektin në Zvërnec, tha se nuk ishte vendi i duhur për të dhënë një qëndrim të detajuar mbi projektin, por theksoi se PD nuk është kundër investimeve të huaja.
Berisha dënoi dhunën ndaj protestuesit, duke e cilësuar atë “rrëmbim në duart e policisë” dhe një akt të shëmtuar të Policisë së Shtetit.
“Nëse është fjala për dhunën e ushtruar ndaj protestuesit, e dënoj. Ishte rrëmbim në duart e policisë, akt i shëmtuar i Policisë së Shtetit”, tha Berisha.
Ai shtoi se nuk ka parë dokumentacionin e plotë të projektit, por ka ndjekur publikimet që janë bërë për të.
“Nuk kam asnjë faqe të atij projekti, megjithëse kam ndjekur me shumë interes të gjitha publikimet që janë bërë”, u shpreh ai.
Berisha tha se Partia Demokratike është parti që mbështet investimet e huaja, por njëkohësisht garantimin e pronës dhe të drejtave të pronarëve.
“PD është një parti që mbështet shumë investimet e huaja dhe qeveria ime ka pasur një ligj që zgjidhte në mënyrë të plotë dhe totale çështjet e pronësisë”, deklaroi ai.
Sipas Berishës, nëse një qeveri miraton një projekt të një investitori të huaj mbi bazën e dokumenteve kadastrale dhe më pas lindin probleme pronësie, shteti duhet t’i përgjigjet pronarit me çmimin e tregut.
“Nëse ty si pronar të kanë shkelur të drejtën e pronës, shteti do të të përgjigjet me vlerën e tregut”, tha Berisha.
Ai theksoi se Partia Demokratike mbështet protestat kundër abuzimeve, por nuk mbështet largimin e investitorëve të huaj nga Shqipëria.
“PD është partia që proteston më fuqishëm se kurrë, por mbështet investimet e huaja, garanton pronat dhe pronarët me një ligj të drejtë. Nuk ka interes më të mbrapshtë se përpjekja për të përzënë investitorët e huaj”, u shpreh Berisha.
Debati për Zvërnecin vijon të jetë në qendër të vëmendjes politike dhe publike, pas protestave në zonë, dhunës ndaj një protestuesi nga persona të sigurisë private dhe hetimeve të SPAK për tjetërsimin e dyshuar të pronave. /skyweb.al
