Kompania e lidhur me projektet e Jared Kushner në Shqipëri ka reaguar për herë të parë pas protestave disa ditore kundër investimit të parashikuar në zonën e Zvërnecit.
Në një përgjigje për Radion Evropa e Lirë, Affinity Partners, kompania e lidhur me dhëndrin e presidentit amerikan Donald Trump, deklaroi se respekton “proceset e vazhdueshme publike dhe institucionale” dhe se është e gatshme të ecë përpara ndërsa ato zhvillohen.
Reagimi erdhi pas protestave në Zvërnec dhe më pas në Tiranë, ku banorë të zonës, qytetarë dhe përfaqësues të shoqërisë civile kërkuan anulimin e projektit turistik në zonën Pishë Poro, Nartë, pranë Vlorës.
Kjo zonë është pjesë e një peizazhi të mbrojtur me rëndësi kombëtare dhe ndërkombëtare, çka ka shtuar shqetësimet për ndikimin mjedisor të projektit, çështjet e pronësisë së tokës dhe mungesën e transparencës mbi investimin.
“Fokusi ynë mbetet te kujdesi i përgjegjshëm, përmirësimi mjedisor, krijimi i vendeve të punës dhe krijimi i vlerës afatgjatë për komunitetet lokale”, tha për REL Asher Abehsera, kryetar i Sazan Real Estate Development LLC.
Ai shtoi se kompania është “e entuziazmuar për mundësinë për të krijuar një destinacion të klasit botëror dhe për të realizuar një nga investimet më të mëdha private në historinë e rajonit”.
Protestat nisën javën e kaluar në Zvërnec, pas nisjes së punimeve në zonë, ndërsa vijuan edhe të martën në Tiranë. Protestuesit kërkuan anulimin e projektit dhe dorëheqjen e kryeministrit Edi Rama.
Ndërkohë, organizatat mjedisore kanë nisur edhe mbledhjen e nënshkrimeve përmes një peticioni online kundër projektit.
Kryeministri Edi Rama e ka mbrojtur publikisht investimin dhe ka deklaruar se projekti nuk do të ndalet për sa kohë ai është kryeministër.
Rama tha gjithashtu se SPAK ka bllokuar një transaksion prone të lidhur me projektin. Megjithatë, Prokuroria e Posaçme nuk ka konfirmuar publikisht bllokimin e ndonjë transaksioni.
Më 1 qershor, SPAK konfirmoi se ka nisur një hetim lidhur me Zvërnecin, por nuk dha detaje mbi objektin konkret të hetimit.
Projekti ka marrë vëmendje edhe për shkak të deklarimeve të mëhershme të Jared Kushner. Në mars 2024, ai deklaroi se synonte të ndërtonte hotele dhe qindra vila në zonën e Zvërnecit.
Kompania e Kushner mori statusin e investitorit strategjik në dhjetor 2024 për ndërtimin e një resorti luksoz në ishullin e Sazanit. Vendimi u mor nga Komiteti i Investimeve Strategjike, i drejtuar nga kryeministri Rama.
Sa i përket Zvërnecit, Rama deklaroi të martën se Kushner “nuk ka bërë kërkesë për të qenë investitor strategjik”. /REL
