Një skandal i rëndë financiar ka goditur Uba Bank në Tiranë, ku punonjës të saj dyshohet se kanë vjedhur nga llogaritë e dy klientëve shuma të mëdha parash përmes falsifikimit të dokumenteve dhe ndërhyrjeve në sistemet bankare.
Sektori për Hetimin e Krimeve Ekonomiko Financiare në DVP Tiranë, nën drejtimin e Prokurorisë, ka finalizuar operacionin e koduar “Wrong Transaction”, pas një hetimi proaktiv të nisur mbi kallëzimet e dy shtetasve.
Në përfundim të hetimeve janë ekzekutuar masa sigurie për 11 punonjës të bankës, ndërsa një tjetër punonjëse është shpallur në kërkim.
Sipas policisë, punonjësit e bankës, duke shpërdoruar detyrën, dyshohet se kanë falsifikuar dokumente dhe kanë ndërhyrë në sistemet bankare të dy klientëve, duke u vjedhur nga llogaritë e tyre në total 309 740 euro dhe 92 000 dollarë.
Në kuadër të operacionit, gjykata ka caktuar masën “Arrest në burg” për shtetasit A. K., 33 vjeç dhe G. H., 38 vjeç, banues në Tiranë, përkatësisht drejtor dhe zëvendësdrejtor i një filiali banke të nivelit të dytë.
Gjithashtu, është caktuar masa “Arrest në shtëpi” për shtetaset G. B., 42 vjeçe, D. D., 24 vjeçe, O. K., 24 vjeçe, R. S., 27 vjeçe dhe Zh. B., 26 vjeçe, të gjitha banuese në Tiranë dhe punonjëse shërbimi në bankë.
Ndërkohë, masa “Pezullim i ushtrimit të detyrës a shërbimit publik” është caktuar për shtetasit E. Q., 47 vjeçe, I. D., 25 vjeçe, E. K., 38 vjeçe dhe B. M., 25 vjeç, të gjithë banues në Tiranë dhe punonjës shërbimi në të njëjtën bankë.
Në vijim të veprimeve, policia ka shpallur në kërkim shtetasen B. N., 25 vjeçe, gjithashtu punonjëse shërbimi, ndaj së cilës është caktuar masa e sigurisë “Arrest në shtëpi”. Policia bën me dije se po punohet për kapjen e saj.
Dosja tashmë i është referuar Prokurorisë së Tiranës për veprime të mëtejshme hetimore.
Materialet procedurale janë regjistruar për veprat penale “Vjedhja duke shpërdoruar detyrën”, “Mashtrimi kompjuterik” dhe “Falsifikimi i dokumenteve”.
Të arrestuarit:
Drejtori, Gilbert Hoxha
Zv.drejtori, Albin Keta
Punonjësit në arrest shtëpie:
Griselda Bana
Dorisa Doka
Oksana Kadiu
Resmije Stafa
Blerta Nelaj
Zhaklina Buçpapaj
Elona Qose
Iva Dollaku
Ensuida Keci
Bjorn Mazniku
/skyweb.al
