Prokuroria e Posaçme ka bërë prapaktheu duke liruar llogaritë bankare të kompanisë së lidhur me investitorët nga Katari, e angazhuar në projektin e Zvërnecit.
Llogaritë ishin bllokuar në kuadër të një hetimi për dyshimet mbi një skemë të tjetërsimit të pronave në këtë zonë. Por, sipas portalit Lapsi.al, SPAK ka vendosur të lirojë llogaritë që lidhen me vëllezërit miliarderë nga Katari, Ramez dhe Mohamad Al-Khayyat.
Të njëjtat burime thanë se lirimi i llogarive është bërë për të shmangur përballje të mundshme ligjore në Gjykatën e Arbitrazhit.
Megjithatë, hetimet për çështjen e pronësisë së tokës në Zvërnec mësohet se vijojnë.
Më herët, edhe kryeministri Edi Rama kishte bërë një paralajmërim publik ndaj SPAK, duke kërkuar që hetimet për çështjet e pronësisë të mos shndërroheshin në bllokim të investitorëve të huaj.
SPAK kishte sekuestruar më parë edhe llogaritë bankare të kompanisë “Albania Land Development”, në kuadër të hetimeve për një skemë të dyshuar të tjetërsimit të pronave në zonën e Zvërnecit.
Një nga administratorët e kompanisë, Redi Struga, i është nënshtruar kontrollit nga agjentët e Byrosë Kombëtare të Hetimit, si pjesë e veprimeve hetimore që po zhvillohen nga Prokuroria e Posaçme.
Hetimet dyshohet se lidhen me një mekanizëm të mundshëm për kalimin e pronave shtetërore në duar private.
Në qendër të hetimit përmendet Artur Shehu, i cili aktualisht jeton në Shtetet e Bashkuara. Sipas burimeve hetimore, ai dyshohet se ka pasur rol drejtues në skemën e pretenduar të tjetërsimit të pronave.
Vendimi për lirimin e llogarive bankare e zhvendos çështjen në një tjetër plan: nga njëra anë vijojnë hetimet për pronësinë e tokës, ndërsa nga ana tjetër duket se SPAK ka shmangur mbajtjen e bllokuar të fondeve të investitorëve të huaj, në një projekt që është paraqitur si një nga investimet më të mëdha në rajon.
