Kreu i Grupit Parlamentar të Partisë Socialiste, Taulant Balla, ka dhënë një sinjal të qartë për zhvillimet politike në Tiranë, duke përjashtuar mundësinë e zgjedhjeve për Bashkinë në këtë periudhë dhe duke i mbyllur rrugën ambicieve të Erion Braçes.
Në një deklaratë për mediat, Balla u shpreh se, sipas vendimit të Gjykatës Kushtetuese, nuk do të ketë zgjedhje në Bashkinë e Tiranës në intervalin mes 15 prillit dhe 15 majit.
Në këtë kuadër, Erion Veliaj mbetet kryetar de jure i bashkisë, duke përjashtuar çdo skenar për një garë të afërt.
Ky qëndrim i Ballës vjen në një kohë kur deputeti Erion Braçe ka shprehur publikisht ambicien për të qenë pjesë e garës për drejtimin e Tiranës. Me këtë deklaratë, duket se kjo mundësi bie, të paktën për momentin.
Balla komentoi edhe zërat për kritika brenda Partisë Socialiste, duke thënë se nuk ka dëgjuar të tilla dhe se çdo socialist ka të drejtë të shprehë mendimin e tij në kuadër të procesit të analizës së brendshme që po zhvillohet në parti.
Ai shtoi se ky proces është i hapur për të gjithë dhe do të vijojë deri në Asamble, ndërsa për çështjen e Elisa Spiropalit u shpreh se vendimi do të bëhet publik në vijim.
Deklarata e Ballës konsolidon linjën zyrtare të shumicës, duke e shtyrë në kohë çdo zhvillim elektoral në Tiranë dhe duke lënë në fuqi status quo-në aktuale në drejtimin e bashkisë. /skyweb.al
