Kryeministri Edi Rama i është përgjigjur senatorit demokrat amerikan Bernie Sanders, pas qëndrimit të këtij të fundit në mbështetje të protestave në Shqipëri kundër projektit të resortit në Zvërnec.
Në një reagim të gjatë, Rama thotë se Shqipëria “është një shtet, jo një rresht në një debat politik amerikan”, duke akuzuar Sanders se është bazuar te titujt e lajmeve dhe jo te faktet në terren.
Kreu i qeverisë kundërshtoi pretendimet për një katastrofë mjedisore, duke theksuar se ende nuk ka as projekt të miratuar, as leje ndërtimi dhe as projekt përfundimtar.
Sipas Ramës, aktualisht bëhet fjalë vetëm për një proces planifikimi, ku janë përfshirë arkitektë, ekspertë mjedisorë dhe konsulentë ndërkombëtarë për të hartuar një vizion turizmi elitar të qëndrueshëm.
“Mospajtimi është legjitim. Vëzhgimi dhe shqyrtimi mjedisor janë të mirëpritura. Por të shpallësh diçka si katastrofë mjedisore përpara se ajo të ekzistojë, është diçka krejt tjetër”, shkruan Rama.
Ai shton se zhvillimi i bregdetit shqiptar do të përcaktohet nga ligjet, institucionet dhe qytetarët shqiptarë, jo nga “indinjata e importuar” apo “reflekset ideologjike”.
Rama thekson se Shqipëria mirëpret investitorë seriozë që krijojnë vende pune, rrisin standardin e jetesës dhe respektojnë rregullat, ndërsa shton se vendi nuk duhet kthyer në instrument politik të askujt.
Në fund, kryeministri ftoi Sanders të vizitojë Shqipërinë, duke thënë se vendi po përballet me sfidën historike për t’u bërë anëtar i Bashkimit Europian dhe se çdo projekt që prek natyrën duhet të kalojë përmes standardeve dhe vlerësimeve të rrepta mjedisore.
