Një ish-pilot i kompanisë ajrore Air Canada akuzohet se ka transportuar mijëra pasagjerë në fluturime komerciale për 17 vjet pa pasur licencën e duhur, sipas autoriteteve, raporton BBC.
Policia tha se piloti 59-vjeçar, Geoffrey Wall nga Ontario, u zbulua se kishte fluturuar me dokumente të falsifikuara që nga promovimi i tij në postin e kapitenit në vitin 2009. Ai tani përballet me disa akuza që lidhen me mashtrimin.
Air Canada deklaroi se piloti u largua menjëherë nga detyra sapo dokumentet e rreme u zbuluan vitin e kaluar. “Kompania e raportoi vullnetarisht rastin te Transport Canada,” tha linja ajrore.
Sipas policisë, gjatë 17 viteve të fundit Wall ka pilotuar disa lloje avionësh Boeing, ka kryer rreth 900 fluturime brenda dhe jashtë vendit dhe ka fituar miliona dollarë në paga, të gjitha këto, sipas akuzave, pa pasur kualifikimet e nevojshme.
Autoritetet thanë se mashtrimi i dyshuar u zbulua vitin e kaluar gjatë një vlerësimi rutinë, kur u vunë re mospërputhje në dokumentacionin e licencës së tij. Kjo çoi në një hetim nga Transport Canada, departamenti federal i transportit në Kanada.
Më pas, Policia Rajonale e Peel-it, në zonën e Torontos, nisi një hetim penal ndaj Wall-it. Hetimi përfshiu një urdhër kontrolli dhe analizën e licencës, e cila sipas policisë rezultoi e falsifikuar.
Më 1 qershor, Wall u akuzua për shtatë vepra penale, përfshirë mashtrimin, falsifikimin e dokumenteve dhe posedimin e një marke të falsifikuar.
Air Canada tha se piloti kishte trajnim të plotë dhe një licencë të vlefshme piloti komercial, por nuk zotëronte Licencën e Pilotit të Transportit Ajror (ATPL), e cila kërkohet sipas rregullave kanadeze për të ushtruar detyrën e kapitenit.
Në deklaratën e saj, kompania shtoi se “e merr këtë çështje me seriozitetin maksimal” dhe se kishte kryer një auditim të pilotëve të saj pa gjetur raste të tjera mosrespektimi të rregullave.
I pyetur se si mashtrimi i dyshuar mundi të kalonte pa u zbuluar për kaq shumë vite, zëvendësshefi i policisë Nick Milinovich tha se autorët e mashtrimeve mund të bëhen shumë të aftë në “gënjeshtra dhe mashtrime”.
“Nuk është e pazakontë që mashtrimet të vazhdojnë për vite me radhë,” tha ai. “Në fund ato zbulohen dhe atëherë ne ndërhyjmë.”
Kompania ajrore theksoi se siguria e pasagjerëve nuk ishte kurrë në rrezik, duke vënë në dukje se të gjithë pilotët i nënshtrohen testimeve dhe trajnimeve të kompetencës çdo gjashtë muaj.
Sipas Milinovich-it, Wall kishte punuar për Air Canada për 27 vjet, duke e nisur karrierën e tij në vitin 1998.
Policia tha se ai kishte paraqitur në mënyrë të rreme kualifikimet e tij që nga viti 2009, kur u promovua në pozicionin e pilotit komandues (kapitenit).
Për këtë rol, pilotët duhet të kenë një licencë ATPL, e cila merret pjesërisht duke kaluar një seri provimesh me shkrim.
“Ky rast është i ngjashëm me një mjek që ka licencë për të ushtruar mjekësinë familjare, por kryen operacione në tru në zyrën e tij,” tha Milinovich. /skyweb.al
