Një valë ekstreme të nxehti përfshiu një pjesë të madhe të Evropës të dielën, me temperaturat që iu afruan 40 gradë Celsius, duke detyruar autoritetet të lëshojnë paralajmërime kombëtare, të përballen me ndërprerje në transport dhe të vërejnë shenja stresi te fauna e egër dhe në zonat turistike, raporton Reuters.
Rritja e temperaturave më 21 qershor, dita e solsticit veror në hemisferën veriore dhe zakonisht fillimi i tre muajve më të nxehtë të vitit ngriti shqetësime për një fillim të hershëm dhe të zgjatur të kushteve ekstreme klimatike.
Pas disa ditësh me temperatura mbi 35°C, autoritetet italiane shpallën alarm të kuq për 21 qershorin në tetë qytete, përfshirë Bolonjën, Firencen, Milanon dhe Torinon.
Në Romë, pelegrinët në Sheshin e Shën Pjetrit përdorën çadra dhe ombrella për t’u mbrojtur nga dielli përvëlues, ndërsa Papa drejtoi lutjen tradicionale të së dielës nga një dritare e Pallatit Apostolik.
Rritja e temperaturave po shkaktohet nga një masë ajri të nxehtë që po lëviz drejt veriut nga Shkretëtira e Saharasë, e ushqyer nga një sistem i fuqishëm presioni të lartë i njohur si “anticikloni afrikan”.
Meteorologët thonë se ky sistem po krijon të ashtuquajturën “kupolë të nxehtësisë” (heat dome), e cila bllokon ajrin e nxehtë mbi Evropën Perëndimore dhe Qendrore, duke bërë që temperaturat të rriten dita-ditës.
Banorët dhe turistët në Madrid përdorën ventilatorë portativë dhe konsumuan pije të ftohta teksa vizitonin tregun e famshëm “El Rastro”.
“Jam veshur e gjitha me të bardha sepse është shumë vapë dhe e mbaj ventilatorin tim elektrik kudo që shkoj”, tha Haily San Cesario, një inxhiniere 22-vjeçare nga Miami.
Agjencia spanjolle e meteorologjisë AEMET lëshoi alarme të kuqe dhe portokalli në disa rajone, duke paralajmëruar se temperaturat do të kalojnë 39 deri në 40°C në pjesë të mëdha të Gadishullit Iberik dhe në Majorka. Sipas saj, vala e të nxehtit do të zgjasë të paktën deri në mesin e javës.
Trenat anulohen në Francë
Temperaturat ekstreme kanë filluar të ndikojnë edhe në infrastrukturë.
Duke folur nga stacioni Gare Montparnasse në Paris, drejtori i kompanisë hekurudhore franceze SNCF, Jean Castex, tha se rrjeti hekurudhor është “ndikuar ndjeshëm” nga temperaturat e larta, të cilat rrezikojnë të dëmtojnë linjat ajrore të energjisë dhe të shkaktojnë zgjerimin e shinave.
Ai tha se 3,500 punonjës janë angazhuar për monitorimin e rrjetit, ndërsa 2,000 të tjerë do të kryejnë riparime emergjente. Castex u bëri thirrje udhëtarëve më të rrezikuar të shtyjnë udhëtimet e tyre.
Operatori hekurudhor ka anuluar 71 trena ndërqytetës deri të hënën në disa prej linjave kryesore.
Në Gjermani, ku temperaturat kanë arritur deri në 38°C, shërbimi meteorologjik DËD paralajmëroi stuhi të forta në rajonet lindore, përfshirë Berlinin, ku reshjet e dendura ndërprenë festivalin e hapur “Fête de la Musique”.
Organizatorët u detyruan të evakuonin ambientet e turneut të tenisit Berlin Open, pasi nisën reshje të forta dhe erëra të fuqishme, ndërkohë që tifozët prisnin finalen e turneut mes amerikanes Jessica Pegula dhe çekes Linda Noskova.
Temperaturat po dëmtojnë edhe kafshët e egra
Qendrat e shpëtimit të kafshëve raportojnë gjithashtu një rritje të ndjeshme të rasteve të stresit nga nxehtësia.
Një qendër pranë qytetit belg Namur tha se kishte pranuar rreth 150 kafshë të prekura nga temperaturat e larta gjatë ditëve të fundit, me zogjtë e vegjël që konsiderohen më të rrezikuarit.
“Zogjtë e vegjël preferojnë të hidhen nga foletë sesa të vdesin duke u pjekur fjalë për fjalë brenda tyre”, tha themeluesi i qendrës CREAVES, Romain De Jaegere, duke shtuar se qendrat e shpëtimit në të gjithë Belgjikën janë të mbingarkuara.
Ekspertët thonë se kjo situatë pasqyron një prirje më të gjerë: valët e të nxehtit në Evropë po bëhen gjithnjë e më të shpeshta dhe më intensive si pasojë e ndryshimeve klimatike.
/skyweb.al
