Kryeministri Edi Rama ka njoftuar nga Parisi se projekti për rilindjen e Liceut Francez të Korçës është tashmë në tryezën e Presidentit francez Emmanuel Macron.
Në një postim në rrjetet sociale, Rama publikoi një foto me Macron, ku shihet duke mbajtur në duar projektin për shkollën, të cilën e cilësoi si një nga nismat që do të zhvillohen nën kujdesin e kreut të shtetit francez.
“Sot edhe Rilindja e Liceut Francez të Korçës është në tryezën e Presidentit të Francës”, shkroi Rama, duke e paraqitur këtë si pjesë të marrëdhënieve të reja mes Shqipërisë dhe Francës.
Por njoftimi ngre pikëpyetje mbi rezultatin e këtij takimi.
Në një moment kur Shqipëria pret mbështetje më të qartë për procesin e integrimit europian, investime të huaja, garanci politike nga Parisi apo marrëveshje strategjike më të rëndësishme, rezultati më i prekshëm i komunikimit publik duket të jetë rikonstruksioni i një shkolle në Korçë.
Krahasimi bëhet edhe më i fortë kur vende të tjera të rajonit apo Europës dalin nga takime me Francën me marrëveshje për siguri, mbrojtje, bashkëpunim ushtarak apo blerje sistemesh të avancuara armatimi, ndërsa Shqipëria prezanton si arritje kryesore një projekt arsimor lokal.
Rama e cilësoi këtë zhvillim si pjesë të partneritetit strategjik me Francën në Ballkan, duke shkruar se një dekadë më parë një marrëdhënie e tillë do të dukej “e paimagjinueshme”.
Megjithatë, përtej simbolikës historike të Liceut Francez të Korçës, mbetet pyetja nëse një takim i këtij niveli duhej të prodhonte më shumë se një premtim për rikonstruksion shkolle. /skyweb.al
