Numri i shqiptarëve që vijojnë të punojnë edhe pas moshës së pensionit është rritur gjatë vitit 2025, duke reflektuar jo vetëm plakjen e popullsisë, por edhe nevojën e shumë të moshuarve për të siguruar të ardhura shtesë.
Sipas raportit të INSTAT për tregun e punës, gjatë vitit 2025 numri i të punësuarve mbi 65 vjeç arriti në 130,274 persona, nga 119,862 që ishte një vit më parë. Kjo do të thotë se mbi 10 mijë persona më shumë kanë vijuar të jenë aktivë në tregun e punës edhe pasi kanë kaluar moshën zyrtare të daljes në pension.
Të dhënat tregojnë se pjesa më e madhe e kësaj kategorie janë të vetëpunësuar në bujqësi. INSTAT i konsideron të punësuar edhe personat që punojnë në fermat e tyre të vogla, edhe kur prodhimi përdoret kryesisht për vetëkonsum.
Rritja e numrit të të moshuarve që punojnë vjen në një periudhë kur Shqipëria po përballet me plakje të popullsisë dhe tkurrje të grupmoshave në moshë pune. Në vitin 2025, popullsia 15 vjeç e lart zbriti në rreth 2 milionë banorë, ndërsa numri i personave ekonomikisht aktivë shënoi një rënie të lehtë.
Nga ana tjetër, pensionistët mbeten pjesa dominuese e popullsisë ekonomikisht joaktive. Sipas raportit, 51% e personave ekonomikisht joaktivë mbi 15 vjeç janë individë që janë larguar nga tregu i punës për shkak të pensionit.
Fenomeni lidhet me ndryshimet demografike, por edhe me realitetin ekonomik të shumë familjeve, sidomos në zonat rurale, ku pensionistët vijojnë të merren me bujqësi edhe pas daljes në pension. Në shumë raste, puna në fermë nuk është vetëm burim të ardhurash, por edhe pjesë e mënyrës së jetesës.
Edhe pse Shqipëria ka aktualisht një nga nivelet më të ulëta të papunësisë në vitet e fundit, të dhënat tregojnë se tregu i punës po ndikohet gjithnjë e më shumë nga plakja e popullsisë, emigrimi dhe mungesa e forcës së re punëtore.
Rritja e numrit të pensionistëve që vijojnë të punojnë është një nga treguesit më të qartë të këtij transformimi. /skyweb.al
