Masa e sigurisë “arrest në shtëpi” ndaj ish-drejtoreshës së Shërbimit Informativ të Shtetit, Vlora Hyseni, ka hapur një kapitull të ri në hetimet e SPAK për biznesmenin Ergys Agasi.
Sipas informacioneve të publikuara nga InfoNews Albania, hetuesit dyshojnë se marrëdhënia mes Hysenit dhe Agasit nuk kufizohej vetëm te komunikimet apo takimet mes tyre.
Dyshimet janë se Hyseni mund të ketë përdorur aksesin dhe informacionet që zotëronte për shkak të detyrës, për t’i krijuar lehtësi Agasit gjatë periudhës kur ai ndodhej në arrati.
Një nga pistat që po verifikohet lidhet me mundësinë që biznesmeni të ketë përdorur automjete të lidhura me SHISH-in ose me drejtuesen e institucionit.
Më herët është pretenduar publikisht se Agasi, pavarësisht se kërkohej nga autoritetet, lëvizte me një automjet tip “Audi A8”, i cili dyshohej se i përkiste Vlora Hysenit. Ky pretendim mbetet pjesë e fakteve që duhet të verifikohen nga organet e drejtësisë.
Por hetimi shkon përtej përdorimit të një automjeti.
SPAK dyshon se Hyseni mund t’i ketë përcjellë Agasit informacione të siguruara për shkak të funksionit të saj në krye të SHISH-it.
Mes tyre dyshohet se mund të ketë pasur të dhëna mbi lëvizjet e strukturave shtetërore dhe veprimet që po ndërmerreshin për lokalizimin ose arrestimin e tij.
Një element i rëndësishëm i hetimit lidhet me një hard disk të sekuestruar gjatë arrestimit të Ergys Agasit.
Në këtë pajisje dyshohet se janë gjetur edhe komunikime mes tij dhe Vlora Hysenit. Përmbajtja e tyre nuk është bërë publike, ndërsa hetuesit po verifikojnë natyrën e informacioneve të shkëmbyera dhe mënyrën se si mund të jenë përdorur.
Ndaj Hysenit janë ngritur dyshime për veprat penale “Përkrahja e autorit të krimit” dhe “Zbulimi i akteve ose të dhënave sekrete”.
Në kuadër të hetimit janë zhvilluar edhe kontrolle, gjatë të cilave, sipas raportimeve, janë gjetur materiale të klasifikuara si sekret shtetëror.
Megjithatë, deri në përfundimin e hetimeve dhe marrjen e një vendimi gjyqësor të formës së prerë, personat nën hetim konsiderohen të pafajshëm.
