Ryanair kërkon ndalimin e shitjes së alkoolit në aeroporte, duke argumentuar se numri i pasagjerëve të dehur në bord është bërë problem serioz për sigurinë dhe qetësinë gjatë fluturimeve.
Sipas raportimeve të mediave italiane, kompania ajrore low cost ka ngritur shqetësimin se konsumimi i alkoolit para nisjes së avionit po sjell gjithnjë e më shumë raste sjelljesh të papërshtatshme në kabinë.
Ryanair vlerëson se shumë pasagjerë e blejnë dhe e konsumojnë alkoolin në zonat e aeroportit përpara hipjes në avion, çka e bën më të vështirë kontrollin nga stafi i fluturimit. Për këtë arsye, kompania kërkon masa më të forta ndaj shitjes së pijeve alkoolike në aeroporte.
Kompania ka argumentuar se, ndryshe nga baret dhe restorantet në tokë, në avion ekuipazhi përballet me situata më të vështira, pasi pasagjerët problematikë ndodhen në një hapësirë të mbyllur dhe gjatë fluturimit nuk mund të largohen menjëherë.
Çështja ka hapur debat mbi përgjegjësinë e aeroporteve, kompanive ajrore dhe vetë pasagjerëve, në një kohë kur incidentet në bord janë kthyer në shqetësim të përsëritur për sektorin e aviacionit.
