Kryeministri Edi Rama ka reaguar me ironi ndaj kritikave për projektligjin që lidhet me mundësinë e blerjes së tokës në Shqipëri nga shtetas të vendeve të Bashkimit Europian.
Në një postim në “Facebook”, Rama iu përgjigj akuzave të protestuesve dhe kritikëve, të cilët e kanë cilësuar nismën si “antikombëtare” dhe si cenim të sovranitetit të vendit.
Kryeministri citoi vargjet e At Gjergj Fishtës: “Po nuk ban kurrë hajër Shqipnija, n’se padija dhe krenija do të shkojnë njit si trupi e hija”, ndërsa ironizoi kundërshtarët e projektligjit.
“Paj Zotin shikojeni se kush do ju shpëtojë nga unë, një patriot që nuk lexon dot një ligj me 10 nene”, shkroi Rama.
Ai sqaroi se projektligji është pjesë e procesit të negociatave për anëtarësimin e Shqipërisë në Bashkimin Europian dhe se efektet e tij nuk hyjnë menjëherë në fuqi.
Sipas Ramës, dispozitat që lidhen me shitjen e tokës për shtetasit e BE-së do të zbatohen vetëm 7 vite pas hyrjes së Shqipërisë në union.
Kreu i qeverisë theksoi se, pas anëtarësimit, qytetarët e vendeve të BE-së do të kenë të drejtë të blejnë tokë në Shqipëri, njësoj si shqiptarët do të kenë mundësi të blejnë prona në vendet e Bashkimit Europian.
“Me hyrjen në BE, Shqipëria do të jetë e madhe sa BE-ja dhe BE-ja do të jetë e vogël sa Shqipëria”, shkroi Rama, duke e cilësuar reagimin kundër projektligjit si keqinformim dhe paaftësi për të lexuar përmbajtjen e nismës. /skyweb.al
