Qoftë duke iu përgjigjur email-eve apo duke marrë pjesë në videokonferenca, një pjesë e madhe e jetës në zyrë kalon ulur në një karrige, shkruan BBC.
Por ky zakon po dëmton shëndetin tonë. Sipas ekspertëve, qëndrimi ulur për periudha të gjata rrit rrezikun e mbipeshës, sëmundjeve të zemrës dhe zhvillimit të diabetit të tipit 2.
Edhe pse e dimë se pushimet nga ekrani janë të dobishme për shëndetin, ajo që mbetet e paqartë është sa shpesh duhet të ngrihemi dhe të lëvizim, duke ruajtur njëkohësisht produktivitetin në punë.
Një studim i ri, i botuar në British Journal of Sports Medicine, ka zbuluar se marrja e një pushimi pesëminutësh çdo orë është mënyra më e mirë dhe më e realizueshme për të përmirësuar mirëqenien pa ulur efikasitetin në punë.
Rritje e produktivitetit, humorit dhe vigjilencës
Studiuesi kryesor, Keith Diaz, i tha BBC News se shumica e të rriturve kalojnë tashmë rreth tre të katërtat e kohës kur janë zgjuar duke qëndruar ulur.
Edhe pse këshilla e përgjithshme për të “qëndruar më pak ulur dhe për të lëvizur më shumë” është e saktë, njerëzit duhet të dinë se sa lëvizje është e nevojshme, shtoi ai.
“Lajmi i mirë është se një shëtitje pesëminutëshe çdo orë është e mjaftueshme për të përmirësuar humorin dhe për të ulur lodhjen. Gjithashtu, pjesëmarrësit e konsideruan këtë një praktikë reale dhe të lehtë për t’u zbatuar,” tha Diaz.
Studimi, i kryer nga Universiteti Columbia, përfshiu më shumë se 11 mijë punonjës në Shtetet e Bashkuara, shumica e të cilëve punonin në zyra dhe kishin turne prej tetë deri në nëntë orë.
Gjatë javës së parë, pjesëmarrësit vazhduan rutinën e tyre të zakonshme dhe plotësuan çdo ditë pyetësorë mbi nivelin e lodhjes, humorin dhe performancën në punë.
Për dy javët në vijim, atyre iu kërkua të bënin shëtitje pesëminutëshe gjatë orarit të punës: çdo gjysmë ore, çdo orë ose çdo dy orë, dhe të plotësonin sërish të njëjtët pyetësorë.
Rezultatet treguan se një shëtitje çdo gjysmë ore përmirësonte humorin dhe ulte lodhjen, por ndërpriste ritmin normal të punës. Ndërsa një shëtitje çdo dy orë ishte më e mirë sesa të mos lëvizje fare, studiuesit zbuluan se një ecje pesëminutëshe çdo orë solli përmirësimin më të madh dhe më praktik në produktivitet, humor dhe vigjilencë.
Të heqësh dorë nga zakoni i qëndrimit ulur për orë të tëra mund të jetë e vështirë, tha Diaz, pasi shumë prej punonjësve të përfshirë në studim shqetësoheshin se çfarë do të mendonin shefat apo kolegët për pushimet e tyre.
“Edhe pse mund të duket kundër intuitës, pushimet për të lëvizur në fakt mund të përmirësojnë performancën në punë,” tha Diaz. “Ato ndihmojnë në përmirësimin e funksioneve ekzekutive të trurit, përqendrimit dhe kujtesës. Gjithashtu, i bëjnë njerëzit të ndihen më të qetë, më të freskët dhe më energjikë.”
