Komisioni Evropian hapi të premten një hetim për të shqyrtuar nëse prodhuesi francez i barnave Sanofi ka shkelur rregullat e konkurrencës së Bashkimit Evropian gjatë një fushate marketingu për vaksinën e gripit, raorton Reuters.
Komisioni tha se është i shqetësuar se Sanofi ka zhvilluar një fushatë mashtruese për të promovuar vaksinën e saj kundër gripit “Efluelda”, ndërsa njëkohësisht ka denigruar vaksinën konkurruese “Fluad”, të prodhuar nga CSL Seqirus, kryesisht në Francë dhe Gjermani.
Sipas Komisionit, në të dy këto tregje, Sanofi mban një pozitë dominuese.
“Sanofi është e bindur se ka vepruar, dhe vazhdon të veprojë, në përputhje të plotë me të gjitha ligjet dhe rregulloret në fuqi, përfshirë edhe ligjin e konkurrencës,” tha një zëdhënës i kompanisë në një deklaratë.
“Kompania i merr shumë seriozisht këto çështje dhe po bashkëpunon plotësisht me Komisionin Evropian gjatë gjithë procesit të hetimit.” /skyweb.al
