Kreu i grupit parlamentar të Partisë Socialiste, Taulant Balla, ka reaguar pas mbledhjes së grupit të PS, ku mori pjesë edhe kryeministri Edi Rama.
Në prononcimin për mediat, Balla u ndal te përplasja me deputeten Marjana Koçeku, si edhe te protestat që po zhvillohen para Kryeministrisë.
I pyetur nëse ka marrë njoftim zyrtar nga Koçeku se nuk do të jetë më pjesë e grupit socialist, Balla tha se ajo duhet të dorëzojë mandatin, pasi sipas tij mandati i përket forcës politike nën logon e së cilës ajo kandidoi.
“Për këtë çështje ua kam sqaruar dhe nuk dua t’i kthehem më komenteve për të ushqyer një telenovelë që nuk më pëlqen. Një njeri që nuk di të respektojë ata që e kanë zgjedhur dhe personin në fjalë e ka zgjedhur PS. Të dorëzojë mandatin, s’është person i votuar drejtpërsëdrejti”, tha Balla.
Lidhur me pretendimet e Koçekut se brenda grupit socialist nuk lejohet mendimi ndryshe, Balla u shpreh se gjatë tetë muajve ka marrë vetëm falënderime prej saj për mënyrën se si e ka drejtuar grupin.
“S’kam asnjë koment, sepse gjatë gjithë 8 muajve kam pasur vetëm falënderime nga deputetja për mënyrën si e drejtoj”, tha ai.
Balla u ndal edhe te protestat para Kryeministrisë, duke përsëritur qëndrimin e mazhorancës se ato janë devijuar nga kauza fillestare.
Ai tha se respekton qytetarët që dolën për shqetësime mjedisore, por sipas tij protesta është marrë nga elementë që lidhen me interesa të tjera.
Balla përmendi konkurrencën rajonale dhe ndikimin e vendeve jo miqësore me Shqipërinë, duke përfshirë edhe Iranin.
“Respektoj ata që dolën në protestë për çështje që lidhen me dyshime, respektimin e normave mjedisore në një investim jetik për ekonominë e vendit, një investim që do të bëhet sepse është mundësi e madhe për Shqipërinë”, tha Balla.
Ai shtoi se brenda protestës janë përfshirë elementë që, sipas tij, e kanë fryrë artificialisht kauzën.
“Duket qartë që janë interesa që lidhen me konkurrencë rajonale, me influencë të vendeve jo miqësore me Shqipërinë. Ky tullumbace po shfryhet i plasur në sytë e gjithë qytetarëve shqiptarë”, u shpreh kreu i grupit socialist.
Balla tha se çështja fillestare, dhuna në Zvërnec, është lënë në hije nga vetë organizatorët dhe grupet që i janë bashkuar protestës.
“Ajo dhunë në Zvërnec ishte dhunë e papranueshme. Sot atë çështje e kanë harruar dhe ata për të cilën u ngritën nuk flasin më. Sot protestën atyre që e nisën, ua kanë vjedhur”, deklaroi Balla.
