Një operacion i gjerë policor është zhvilluar paraditen e sotme në Fier, ku forcat e rendit kanë ndërhyrë në zyrat qendrore të kompanisë koncesionare të naftës Bankers Petroleum Albania.
Si rezultat i aksionit, janë vënë në pranga dy drejtues të lartë të kompanisë: shtetasi kinez Hongping Xiao, aktualisht administrator i kompanisë, dhe Leonidha Çobo, ish-drejtor dhe ish-përgjegjës për operacionet në terren.
Burime bëjnë me dije se kontrollet janë kryer pas hetimeve për borxhe të mëdha ndaj shtetit shqiptar, si dhe për dyshime për abuzim financiar dhe shkelje të kontratës koncesionare.
Sipas dosjes hetimore, Leonidha Çobo dyshohet se ka përfituar miliona lekë përmes një kompanie të nënkontraktuar të quajtur ‘Tea CO’, e cila është në pronësi të të vëllait të tij.
Pagesat janë realizuar përmes llogarisë bankare të bashkëshortes së Çobos, duke ngritur dyshime të forta për konflikt interesi dhe përvetësim fondesh në dëm të kompanisë dhe shtetit.
Kompania Bankers Petroleum, që prej më shumë se një dekade shfrytëzon fushën naftëmbajtëse të Patos-Marinzës, është përballur në të kaluarën me akuzat për mospagim të detyrimeve fiskale dhe ndotje mjedisore, veçanërisht në zonën e Marinzës, ku banorët kanë protestuar në mënyrë të përsëritur për ndotjen e ujit, tokës dhe ajrit.
Operacioni i policisë është shoqëruar me sekuestrime dokumentesh dhe të dhënash financiare, ndërsa hetimet vijojnë në bashkëpunim me strukturat e Tatimeve dhe Prokurorinë e Fierit.
Ky zhvillim pritet të trazojë sërish debatin publik mbi kontratat koncesionare dhe mungesën e kontrollit të duhur mbi kompanitë që administrojnë pasuritë natyrore të vendit. Hetimet janë në vijim dhe priten të përfshijnë edhe emra të tjerë të lidhur me skemën e dyshuar të abuzimit financiar./skyweb.al
