Franca po ndërmerr masa të reja kundër platformave të modës ultra të shpejtë. Senati francez ka miratuar një projektligj që synon të kufizojë praktikat e dëmshme për mjedisin, duke parashikuar ndalimin e reklamave për platformat si Shein, Temu dhe AliExpress që nga fundi i këtij viti.
Projektligji ndalon gjithashtu promovimin e këtyre platformave nga influencuesit. Shkelësit e rregullave do të përballen me sanksione.
Fillimisht, nisma synonte të gjithë industrinë e modës së shpejtë, por tashmë fokusi është ngushtuar te të ashtuquajturat “platformat ultra-ekspres”. Këto janë kompani që hedhin në treg një numër shumë të madh produktesh me çmime tepër të ulëta, duke nxitur konsum të shpejtë dhe duke ulur motivimin e konsumatorëve për të riparuar apo ripërdorur veshjet.
Në praktikë, masat pritet të prekin kryesisht gjigantët kinezë si Shein, Temu dhe AliExpress, ndërsa markat franceze dhe evropiane duket se nuk do të jenë pjesë e kufizimeve. Megjithatë, kriteret për përcaktimin e platformave që do të përfshihen nga ligji ende nuk janë finalizuar.
Përveç ndalimit të reklamave, Franca synon të vendosë edhe një kontribut financiar mjedisor për çdo produkt, i cili do të llogaritet në bazë të ndikimit të tij në mjedis.
Projektligji parashikon gjithashtu që platformat të informojnë dhe inkurajojnë konsumatorët të riparojnë, ripërdorin dhe të konsumojnë në mënyrë më të përgjegjshme.
Sipas Senatit francez, oferta e veshjeve është rritur ndjeshëm gjatë viteve të fundit, ndërsa produktet e modës ultra të shpejtë shiten me çmime shumë të ulëta dhe shpesh prodhohen nga materiale me jetëgjatësi të kufizuar.
