Administrata tatimore shqiptare do të shkëmbejë automatikisht me vendet e Bashkimit Evropian informacion mbi vendimet tatimore ndërkufitare dhe marrëveshjet e çmimit në avancë.
Kjo parashikohet në një projektligj të ri, i cili synon përafrimin e legjislacionit shqiptar me rregullat e BE-së në fushën e tatimeve.
Në fokus janë vendimet tatimore që lidhen me kompani apo grupe kompanish që veprojnë në më shumë se një vend, si dhe marrëveshjet që përcaktojnë mënyrën e vendosjes së çmimeve mes ndërmarrjeve të lidhura.
Qëllimi është rritja e transparencës fiskale dhe parandalimi i shmangies së taksave nga kompani që përdorin struktura ndërkufitare për të ulur detyrimet tatimore.
Sipas projektligjit, Drejtoria e Përgjithshme e Tatimeve do të jetë autoriteti kompetent për shkëmbimin e informacionit me autoritetet tatimore të vendeve të BE-së.
Informacioni do të përfshijë të dhëna mbi vendimet tatimore, marrëveshjet e çmimit në avancë, transaksionet ndërkufitare, metodologjinë e çmimeve të transferimit dhe shtetet që mund të preken nga këto vendime.
Shkëmbimi i të dhënave do të bëhet brenda tre muajve nga përfundimi i gjysmës së vitit kalendarik në të cilin vendimi tatimor ose marrëveshja është nxjerrë, ndryshuar apo rinovuar.
Për personat fizikë, shkëmbimi automatik do të zbatohet vetëm në raste me ndikim të rëndësishëm ndërkufitar, si kur vlera e transaksionit tejkalon 1.5 milionë euro ose kur vendimi lidhet me rezidencën tatimore në Shqipëri. /skyweb.al
