Shqiptarët kanë kryer rreth 4.5 milionë udhëtime gjatë vitit 2025, brenda dhe jashtë vendit, për qëllime personale apo biznesi.
Të dhënat janë publikuar nga INSTAT në anketën e turizmit “Pushime dhe Udhëtime” për vitin 2025. Sipas raportit, udhëtimet për qëllime personale dominojnë thuajse tërësisht lëvizjet e banorëve në Shqipëri.
Ato përbëjnë 97.6% të totalit të udhëtimeve të kryera nga individët mbi 15 vjeç. Ndërkohë, udhëtimet për qëllime biznesi zënë vetëm 2.4% të totalit.
Në shifra, në Shqipëri janë kryer rreth 4.4 milionë udhëtime për qëllime personale dhe vetëm 0.1 milionë për biznes. Kjo tregon se udhëtimet e shqiptarëve lidhen kryesisht me pushime, kohë të lirë, vizita familjare apo arsye të tjera personale.
Për udhëtimet brenda vendit, qëllimi kryesor ishte “pushime dhe kohë e lirë”, me 52.8% të totalit.
Ndërsa për udhëtimet jashtë Shqipërisë, arsyeja kryesore ishin vizitat te të afërmit dhe miqtë, me 52%.
Të dhënat tregojnë se turizmi personal dhe familjar mbetet motori kryesor i lëvizjeve të shqiptarëve. Biznesi, nga ana tjetër, ka një peshë shumë të ulët në strukturën e udhëtimeve. /skyweb.al
