Bashkimi i operatorëve “Europetrol Durrës Albania” sh.a. dhe “Bitex Refinery” sh.a. është shpallur fitues i ankandit më të fundit të zhvilluar nga Albpetrol për shitjen e rreth 101 mijë tonëve naftë. Procedura, e njoftuar në fillim të gushtit, është mbyllur me një ofertë me vlerë rreth 31 milionë euro sipas monitor.al.
Në njoftimin zyrtar të Albpetrol nuk jepet shifra e plotë e ofertës, por theksohet se fituesit duhet të paguajnë sigurimin e kontratës prej 311 milionë lekësh, që përbën 10 për qind të vlerës së saj.
Kontrata duhet të nënshkruhet brenda 15 ditëve, ndërsa sasia e karburantit duhet të tërhiqet brenda një periudhe 12-mujore. Në rast refuzimi ose tërheqjeje, sigurimi i ofertës do të konfiskohet dhe ankandi do të anulohet.
Formati i shitjes është ai i miratuar më herët, ku çmimi minimal llogaritet 77.45% e çmimit ndërkombëtar Brent + K, ndërsa në pikat e lëvrimit 77.45% e Brent – 4.04 USD/bbl + K, ku “K” mbetet diferencë e lirë ofertuesish për të përcaktuar fituesin. Nafta që do të shitet ndodhet në depozita të Albpetrol në Usojë, Visokë, Gorisht, Zharrëz, Kuçovë dhe Amonicë.
Fituesit e përhershëm të ankandeve
“Europetrol Durrës Albania”, kompani në pronësi të Frident Kuqit, dhe “Bitex Refinery”, me bazë në Elbasan (dikur e njohur si R.B.H. Beline), kanë qenë ndër fituesit më të shpeshtë të ankandeve të naftës së Albpetrol ndër vite.
Procedurat e zhvilluara shpesh kanë ngjallur debat, me akuza për mungesë konkurrence reale.
Kontrolli i Lartë i Shtetit ka konstatuar raste kur këto kompani kanë përfituar në mënyrë të padrejtë duke deklaruar shpenzime për eksport të naftës, ndërkohë që produkti është përdorur brenda vendit.
Sipas raportit të KLSH, Albpetrol u zbret kompanive vendase shpenzimet e eksportit, pra e regjistron si naftë që kalohet jashtë vendit. Kur në fakt, në shumë raste nuk ka asnjë kompani të huaj që ka blerë naftë nga Albpetrol.
“Grupi i ekspertëve bën llogaritje të ndryshme për transportin me autobote në një port të caktuar, ngrohjen e naftës gjatë rrugës, siguracionin, magazinimin në port, shpenzime shkarkimi etj, duke rezultuar me një ulje në çmimin që duhet të paguajë Operatori Ekonomik fitues i ankandit të shitjes së naftës. Pjesa më e madhe e shpenzimeve që ulen nga çmimi i shitjes janë fiktive pasi nuk ndodhin se shitjet e naftës janë kryer në operatorë ekonomikë vendas dhe nuk ka pasur shoqëri të huaja që janë shpallur fitues të ankandeve”, thuhet në raportin e KLSH mbi Albpetrol.
Nafta që Albpetrol hedh në ankand është e përbërë si nga prodhimi i drejtpërdrejtë i kompanisë, ashtu edhe nga sasitë që i kalojnë sipas marrëveshjeve nga kompanitë koncesionare.
Vetë Albpetrol raportoi për vitin 2024 një prodhim prej mbi 70 mijë tonë naftë, me një rritje modeste prej 1.8% krahasuar me vitin paraardhës.
Në vitin e kaluar, ankandi i fundit i Albpetrol për 159 mijë tonë naftë, me vlerë rreth 70 milionë euro, u fitua po nga Europetrol (kaburantet Eida) dhe R.B.H. Beline (tashmë Bitex Refinery). /skyweb.al
