Shqiptarët kanë shtuar udhëtimet jashtë vendit gjatë vitit 2025, ndërsa rritjen më të fortë e ka shënuar transporti ajror.
Sipas të dhënave të INSTAT në anketën “Pushime dhe Udhëtime”, udhëtimet e kryera jashtë Shqipërisë u rritën me 14.3% krahasuar me vitin 2024.
Kjo tregon se gjithnjë e më shumë banorë të Shqipërisë po zgjedhin destinacione jashtë vendit për pushime, vizita familjare apo arsye të tjera personale.
Rritja është reflektuar edhe te mënyra e udhëtimit. Transporti ajror shënoi rritjen më të lartë, me rreth 14%, duke konfirmuar peshën gjithnjë e më të madhe të fluturimeve në lëvizjet e shqiptarëve.
Destinacionet më të preferuara jashtë Shqipërisë ishin Italia me 11.3%, Greqia me 10.4% dhe Gjermania me 4%. Sipas INSTAT, për udhëtimet jashtë vendit arsyeja kryesore mbeten vizitat te të afërmit dhe miqtë, me 52% të totalit.
Të dhënat tregojnë se emigracioni, lidhjet familjare dhe rritja e aksesit në fluturime po ndikojnë drejtpërdrejt në shtimin e udhëtimeve jashtë vendit.
Në total, gjatë vitit 2025, individët banues në Shqipëri kryen rreth 4.5 milionë udhëtime, brenda dhe jashtë vendit. /skyweb.al
