Antonio Baravalle, CEO i gjigantit italian të kafes Lavazza, ka shprehur shqetësime në lidhje me rritjen e çmimeve të kafesë, duke e krahasuar situatën me një “flluskë” financiare që pritet të shpërthejë.
Në një intervistë për “Financial Times”, Baravalle tha: “Kur shoh se për një kafe ekspres në Londër konsumatori paguan 3-4 paund apo 8 dollar në New York, mund të them se kemi arritur limitin”
Shqetësimet e Lavazza-s vijnë si pasojë e faktorëve të ndryshëm që ndikojnë në industrinë e kafesë. Ndryshimet klimatike kanë goditur rëndë prodhimin e kafesë, veçanërisht në rajone kyçe si Brazili dhe Vietnami, duke çuar në rënie të prodhimit. Për më tepër, tensionet gjeopolitike dhe çrregullimet në zinxhirët e furnizimit kanë rritur shtypjen mbi tregun. Si rezultat, çmimi i kokrrave të kafesë “robusta” ka arritur nivele rekord.
Megjithatë, Lavazza ka zgjedhur të absorbojë një pjesë të madhe të rritjes së kostos, duke mos i kaluar këto çmime te konsumatorët. Kjo strategji ka çuar në një rënie prej 14.9% të fitimit të kompanisë për vitin 2023, me fitimin neto që ka rënë nga 95 milionë euro në 68 milionë euro. Megjithatë, të ardhurat janë rritur me 13% në 3.1 miliardë euro, pjesërisht për shkak të blerjes së grupit francez MaxiCoffee.
Për të ardhmen, Baravalle parashikon se çmimet e kafesë do të mbeten të larta për një periudhë të gjatë, duke theksuar se zinxhiri i furnizimit me kafe është nën presion të madh dhe nuk sheh asnjë lehtësim të menjëhershëm. Si pasojë, konsumatorët mund të vazhdojnë të përballen me çmime të larta për kafenë e tyre të përditshme. /skyweb.al
