Ndërsa Evropa vazhdon të përballet me një valë rekord të të nxehtit, Organizata Botërore e Shëndetësisë (OBSH) paralajmëron se verat e ardhshme do të jenë edhe më të nxehta.
Muaji qershor ka qenë një nga më të nxehtit e regjistruar ndonjëherë në Evropë, me temperatura që kanë arritur nivele rekord në disa vende dhe kanë shkaktuar rritje të numrit të vdekjeve të lidhura me të nxehtin. Sipas OBSH-së, kjo është vetëm fillimi.
“Kjo valë e të nxehtit është një provë gjenerale për atë që na pret,” deklaroi Dr. Hans Henri Kluge, drejtor rajonal i OBSH-së për Evropën.
Sipas tij, Evropa po ngrohet me një ritëm më shumë se dy herë më të shpejtë se mesatarja globale dhe valët e të nxehtit nuk janë më ngjarje të izoluara. Ato janë kthyer në kriza të përsëritura, që po bëhen gjithnjë e më të shpeshta, më intensive dhe më afatgjata.
Gjatë muajit të fundit, Franca ka raportuar mbi 1.000 vdekje që nga 24 qershori, shumica prej tyre te personat mbi 65 vjeç. Në disa qytete, numri i thirrjeve për ndihmë urgjente është rritur deri në 50%.
Ndërkohë, sistemi spanjoll i monitorimit të vdekshmërisë ka vlerësuar se gjatë muajit qershor janë regjistruar 892 vdekje shtesë të lidhura me temperaturat e larta.
Kluge paralajmëroi se çdo verë për të cilën nuk përgatitemi paguhet me jetë njerëzish. Megjithatë, sipas OBSH-së, ka edhe arsye për optimizëm, pasi masat parandaluese kanë dhënë rezultate.
Sipas vlerësimeve të organizatës, numri i vdekjeve të lidhura me të nxehtin në Evropë gjatë vitit 2023 do të kishte qenë rreth 80% më i lartë nëse nuk do të ishin zbatuar masat e përshtatjes. Për personat mbi moshën 80 vjeç, numri i viktimave mund të kishte qenë deri në dy herë më i madh.
“Planet e veprimit për mbrojtjen nga i nxehti, sistemet e paralajmërimit të hershëm, hapësirat për freskim dhe kujdesi ndaj grupeve më të rrezikuara nuk janë thjesht procedura burokratike. Ato po shpëtojnë jetë çdo ditë dhe duhet të zbatohen edhe më gjerësisht në të gjithë rajonin evropian,” tha Kluge.
Sipas Organizatës Botërore Meteorologjike, deri më 30 qershor vala e të nxehtit pritet të përfshijë pjesë të mëdha të Evropës Perëndimore, Qendrore dhe Jugore, si edhe rajonin e Ballkanit.
