Besimi në ekonomi ka shënuar një rënie të lehtë gjatë muajit qershor, sipas vrojtimit të fundit të Bankës së Shqipërisë për biznesin dhe konsumatorin.
Treguesi i Ndjesisë Ekonomike ra me 0.6 pikë, por vijon të mbetet 6.6 pikë mbi mesataren historike.
Rënia u ndikua kryesisht nga dobësimi i besimit në sektorin e shërbimeve dhe, në një masë më të vogël, në ndërtim.
Besimi në shërbime ra me 3.8 pikë, për shkak të vlerësimeve më pak optimiste për aktivitetin aktual dhe kërkesën.
Edhe ndërtimi shënoi rënie me 0.8 pikë, i ndikuar nga ulja e kontratave porositëse.
Nga ana tjetër, tregtia dhe industria dhanë sinjale pozitive. Besimi në tregti u rrit me 2.8 pikë, ndërsa ai në industri me 0.6 pikë.
Konsumatorët shfaqën një përmirësim të lehtë, por besimi i tyre mbetet ende rreth 1 pikë nën mesataren historike.
Raporti tregon se ekonomia vijon të qëndrojë mbi mesataren afatgjatë, por qershori solli sinjale frenimi në sektorët që lidhen drejtpërdrejt me shërbimet dhe ndërtimin. /skyweb.al
