Që prej 1 korrikut, fermerët mund të aplikojnë për përfitimin e kompensimit të TVSH-së përmes autofaturave të lëshuara nga grumbulluesit, përpunuesit ose subjektet e certifikuara të agroturizmit.
Administrata Tatimore ka publikuar udhëzuesin me hapat që duhet të ndjekin fermerët për të përfituar nga kjo skemë. Aplikimi kryhet në platformën e-Filing, ku fermerët duhet të jenë të pajisur me NIPT dhe të verifikojnë autofaturat e shfaqura në sistem.
Sipas të dhënave të Administratës Tatimore, aktualisht në vend janë 113,470 fermerë të pajisur me NIPT.
Si aplikohet?
Fermerët duhet të identifikohen në e-Filing dhe të zgjedhin menunë “Çështje e re”, ku më pas përzgjidhet opsioni “Për rimbursim të fermerëve”.
Në rubrikën “Detajet e bankës” duhet të plotësohen të dhënat e llogarisë bankare, përfshirë numrin IBAN.
Pas plotësimit të kërkesës, sistemi do të shfaqë automatikisht autofaturat e periudhës janar–qershor, të cilat fermeri duhet t’i konfirmojë.
Pasi faturat të identifikohen, sistemi llogarit automatikisht vlerën totale të tyre dhe shumën e kompensimit, e cila është 10%.
Gjithashtu, sistemi verifikon vlefshmërinë e faturave, afatet dhe të dhënat bankare përpara pranimit të aplikimit. Pas dorëzimit, kërkesa merr statusin “Në proces”, ndërsa përgjigjja mund të ndiqet në seksionin “Të dorëzuara”.
Nëse Administrata Tatimore e konsideron të nevojshme, fermerit mund t’i kërkohet të ngarkojë dokumentacion shtesë.
Për të përfituar nga skema, fermeri duhet të jetë i pajisur me NIPT, pa pasur detyrim për deklarim periodik të TVSH-së. Gjithashtu, qarkullimi vjetor nuk duhet të kalojë pragun minimal të regjistrimit për TVSH.
Fermerët që shesin produkte bujqësore ose blegtorale nuk regjistrohen si subjekte të TVSH-së nëse qarkullimi i tyre vjetor është deri në 10 milionë lekë. Në rast se ky kufi tejkalohet, ata duhet të regjistrohen si tatimpagues të TVSH-së.
