Sektori i ndërtimit ka dhënë sinjale frenimi gjatë muajit qershor. Sipas vrojtimit të Bankës së Shqipërisë, treguesi i besimit në ndërtim ra me 0.8 pikë përqindje krahasuar me muajin e mëparshëm.
Rënia është ndikuar kryesisht nga vlerësimet më të dobëta të bizneseve për kontratat porositëse.
Me fjalë të tjera, ndërtuesit raportojnë më pak porosi të reja, ndërsa aktiviteti aktual ndërtues ka mbetur në të njëjtat nivele. Pavarësisht rënies mujore, treguesi i ndërtimit vijon të qëndrojë 11 pikë përqindje mbi mesataren afatgjatë.
Edhe pritjet për çmimet në të ardhmen janë vlerësuar me rënie nga bizneset e sektorit. Të dhënat tregojnë se ndërtimi nuk është në krizë, por po jep sinjale ngadalësimi, sidomos në pjesën e kontratave të reja. /skyweb.al
