Tesla njoftoi të premten se shërbimi i saj Robotaxi është tashmë i disponueshëm edhe në Miami, ndërsa prodhuesi i automjeteve elektrike po zgjeron operacionet e transportit autonom, shkruan Reuters.
Ky zgjerim pasqyron përpjekjet e kompanisë për të rritur përdorimin e teknologjisë së saj të drejtimit autonom, një version i së cilës përdoret në automjetet Robotaxi. Kjo është gjithashtu një pjesë kyçe e strategjisë së shefit ekzekutiv, Elon Musk, për ta orientuar Tesla-n gjithnjë e më shumë drejt inteligjencës artificiale dhe robotikës, përtej fokusit tradicional te automjetet elektrike.
“Robotaxi tani është i disponueshëm në Miami”, shkroi llogaria zyrtare e Robotaxi në platformën X.
Lëvizja e Tesla-s vjen në një kohë kur sektori i taksive autonome po fiton gjithnjë e më shumë terren. Konkurrentë si Waymo, në pronësi të Alphabet, dhe Zoox, në pronësi të Amazon, po përshpejtojnë gjithashtu planet e tyre për zgjerim.
Tesla nisi shërbimin e saj të Robotaxi pa mbikëqyrje njerëzore në Austin, të shtetit të Teksasit, në muajin qershor, pasi kishte njoftuar në prill planet për ta zgjeruar atë edhe në Dallas dhe Houston.
Në muajin maj, Elon Musk deklaroi se pret që automjetet plotësisht autonome, pa nevojën e një personi për mbikëqyrje sigurie, të bëhen shumë më të përhapura në Shtetet e Bashkuara gjatë këtij viti.
Ndërkohë, të enjten Tesla raportoi një numër rekord të dërgesave të automjeteve për tremujorin e dytë të vitit, duke tejkaluar pritshmëritë e analistëve të Wall Street, kryesisht falë rimëkëmbjes së shitjeve në tregun evropian. /skyweb.al
