Shqipëria po konsolidon pozicionin e saj si një nga destinacionet turistike më të kërkuara në Evropë, ndërsa interesi i turistëve francezë për vendin po rritet ndjeshëm. Sipas një artikulli të publikuar nga media digjitale franceze “Peaches.fr”, vendi po fiton gjithnjë e më shumë vëmendje falë kombinimit të plazheve, historisë dhe peizazheve malore.
E cilësuar si “Maldivet e Evropës”, Shqipëria priti rreth 11,9 milionë turistë gjatë vitit 2025, sipas të dhënave të Organizatës Botërore të Turizmit të Kombeve të Bashkuara. Numri i vizitorëve u rrit me 3,3% krahasuar me vitin 2024 dhe me 93,6% në raport me vitin 2019.
Rritja e shpejtë e turizmit e ka vendosur Shqipërinë në fokusin e udhëtarëve evropianë, veçanërisht për shkak të kombinimit të bregdetit me ujëra të kthjellëta, trashëgimisë historike dhe zonave malore.
Riviera Shqiptare, një nga pikat kryesore të turizmit
Riviera Shqiptare vazhdon të jetë ndër zonat më të frekuentuara nga turistët. Vlora, Dhërmiu, Saranda dhe Ksamili janë ndër destinacionet që tërheqin numrin më të madh të vizitorëve gjatë sezonit veror.
Paralelisht me rritjen e kërkesës, është zgjeruar edhe oferta akomoduese, me investime të reja dhe struktura të orientuara drejt turizmit të nivelit të lartë.
Tirana, historia dhe trashëgimia e periudhës komuniste
Kryeqyteti mbetet një tjetër pikë e rëndësishme në itineraret turistike. Tirana ofron një ndërthurje mes zhvillimit urban dhe gjurmëve të historisë së afërt të vendit.
Pranë Sheshit Skënderbej ndodhet Muzeu Historik Kombëtar, i cili aktualisht është i mbyllur për shkak të punimeve dhe pritet të qëndrojë i tillë deri në vitin 2028. Në pjesën e jashtme të ndërtesës ndodhet mozaiku monumental që pasqyron momente dhe figura nga historia e Shqipërisë.
Për turistët e interesuar për periudhën komuniste, një tjetër destinacion është “Shtëpia me Gjethe”, muze që dokumenton veprimtarinë e Sigurimit të Shtetit. Ndërkohë, Bunk’Art 1 dhe Bunk’Art 2, të ngritura në ish-strehimore nëntokësore, ofrojnë një këndvështrim tjetër mbi historinë e regjimit komunist.
Lidhjet ajrore dhe infrastruktura, faktorë të rëndësishëm
Rritja e turizmit është shoqëruar me zgjerimin e infrastrukturës dhe të lidhjeve të transportit. Aeroporti Ndërkombëtar i Tiranës është zgjeruar për t’iu përgjigjur numrit në rritje të udhëtarëve, ndërsa shtimi i fluturimeve me kosto të ulët ka lehtësuar aksesin nga qytetet evropiane.
Që prej vitit 2020, Tirana është një nga bazat e kompanisë ajrore “Wizz Air”, e cila ofron lidhje me një sërë qytetesh evropiane, mes tyre Barcelona, Budapesti, Londra, Madridi, Roma dhe Stokholmi.
Kryeqyteti lidhet gjithashtu me fluturime direkte me qytete si Frankfurti, Amsterdami dhe Stambolli. Përmes transportit rrugor, turistët mund të vazhdojnë udhëtimin drejt vendeve të tjera të rajonit, përfshirë Kosovën, Maqedoninë e Veriut dhe Malin e Zi.
Nga liqenet e veriut te Alpet Shqiptare
Përtej bregdetit, Shqipëria ofron edhe një tjetër profil turistik në veri të vendit.
Shkodra shërben si një pikë e rëndësishme nisjeje drejt zonave malore dhe liqenore. Liqeni i Shkodrës, i cili shtrihet edhe në territorin e Malit të Zi, mund të eksplorohet përmes aktiviteteve në natyrë, përfshirë ecjen dhe çiklizmin.
Nga kjo zonë turistët mund të udhëtojnë drejt Lumit të Shalës dhe Liqenit të Komanit, ndërsa më në veri shtrihen Alpet Shqiptare, një nga destinacionet kryesore për të apasionuarit pas natyrës dhe ecjeve malore.
Ndër itineraret më të njohura është shtegu Valbonë-Theth. Rruga është rreth 12 kilometra e gjatë dhe, në varësi të ritmit dhe kushteve, mund të kërkojë nga shtatë deri në 10 orë ecje.
Me bregdetin, qytetet historike, gjurmët e periudhës komuniste, liqenet dhe malet, Shqipëria po shfaqet gjithnjë e më shumë si një destinacion që ofron eksperienca të ndryshme brenda një udhëtimi të vetëm.
