Me afrimin e sezonit të pushimeve verore, ekspertët e shëndetit po rikujtojnë rëndësinë e mbrojtjes nga rrezet e diellit, ndërsa në treg po shfaqen zhvillime të reja në produktet me faktor mbrojtës (SPF), sipas Wall Street Journal.
Administrata Amerikane e Ushqimit dhe Barnave (FDA) ka miratuar një përbërës të ri për kremrat kundër diellit, i cili pritet të jetë i disponueshëm më vonë gjatë kësaj vere. Miratimi vjen në një kohë kur zgjedhja e produkteve për mbrojtjen nga dielli është bërë më e gjerë se kurrë.
Sot konsumatorët mund të zgjedhin mes kremrave tradicionalë, produkteve kozmetike si fondatinat dhe kremrat hidratues me SPF të integruar, si edhe kremrave mineralë, të cilët përdorin minerale si oksidi i zinkut ose dioksidi i titanit për të krijuar një barrierë fizike ndaj rrezeve ultraviolet. Këta produkte njihen edhe për shtresën e bardhë që mund të lënë mbi lëkurë, por preferohen nga shumë persona për shkak të përbërjes së tyre.
Dermatologët theksojnë se përdorimi i përditshëm i kremit kundër diellit mbetet një nga mënyrat më efektive për të mbrojtur lëkurën nga djegiet, plakja e parakohshme dhe rreziku i zhvillimit të kancerit të lëkurës.
Ekspertët rekomandojnë përdorimin e një kremi me faktor mbrojtës të paktën SPF 30, aplikimin e tij rreth 15 deri në 30 minuta para ekspozimit në diell dhe riaplikimin çdo dy orë, ose më shpesh pas notit apo djersitjes.
Me temperaturat e larta dhe ekspozimin e shtuar ndaj diellit gjatë muajve të verës, zgjedhja e produktit të duhur dhe përdorimi korrekt i tij mbeten thelbësore për mbrojtjen e shëndetit të lëkurës. /skyweb.al
