INSTAT ka publikuar së fundmi të dhënat e inflacionit për muajin qershor 2026, ku tregohet se çmimet vijojnë të rëndojnë buxhetet e familjeve shqiptare.
Inflacioni në qershor arriti në 3.2%, nga 2.4% që ishte në të njëjtin muaj të vitit të kaluar.
Rritja është mbi objektivin 3% të Bankës së Shqipërisë, duke treguar se presioni i çmimeve mbetet i lartë.
Sipas INSTAT, ndikimin më të madh në inflacion e dhanë ushqimet dhe pijet joalkoolike, me +1.02 pikë përqindje. Pas tyre renditet grupi “Qira, ujë, energji elektrike, gaz dhe karburante të tjera”, me +0.96 pikë përqindje.
Kjo do të thotë se dy zërat bazë të jetesës, ushqimi dhe strehimi, janë faktorët kryesorë që po zbrazin xhepat e qytetarëve.
Krahasuar me qershorin 2025, çmimet e qirave, ujit, energjisë dhe karburanteve u rritën me 4.8%. Ndërsa ushqimet dhe pijet joalkoolike u rritën me 3% në bazë vjetore.
Rritje të ndjeshme pati edhe te argëtimi, sporti dhe kultura me 6.1%, si dhe te sigurimet dhe shërbimet financiare me 5.1%.
Edhe pse krahasuar me majin çmimet e konsumit ranë lehtë me 0.1%, të dhënat tregojnë se kostot kryesore të jetesës mbeten në rritje. Familjet shqiptare po paguajnë më shumë për ushqim, qira dhe shërbime bazë, ndërsa të ardhurat nuk po ndjekin të njëjtin ritëm.
