Shqipëria pritet të mbulohet gradualisht nga një sistem masiv kamerash dhe monitorimi në kohë reale, në kuadër të projektit “Smart City”, i cili synon të kontrollojë lëvizjen e qytetarëve dhe automjeteve, të identifikojë persona të kërkuar dhe të sinjalizojë automatikisht situatat e dyshimta.
Kryeministri Edi Rama vizitoi këtë të enjte Qendrën e Komandës dhe Kontrollit të projektit, ku deklaroi se sistemi i ri do të shtrihet në të gjithë territorin e vendit dhe do të mundësojë ndërhyrjen e policisë përpara ose menjëherë pas evidentimit të një rreziku.
Sipas Ramës, kamerat do të jenë në gjendje të identifikojnë armë të ftohta, persona në kërkim, automjete me detyrime të papaguara dhe drejtimin e lëvizjes së tyre, duke e kthyer Qendrën e Kontrollit në pikën kryesore të mbikëqyrjes së hapësirave publike.
“Të gjithë prindërit që kanë fëmijët në shkolla duhet të ndihen mirë. Çdo gjë kërkon kohën e vet. Nuk ka projekt që nuk has pengesa, por sot jemi në një moment kur projekti merr jetë dhe nuk do të ndalemi me shtrirjen e tij në të gjithë territorin.
Përpjekjet e shtetit për të ngritur në një nivel tjetër menaxhimin e sigurisë publike janë të vazhdueshme.
Projekti është ndërtuar në mënyrë që sistemi të informojë në kohë reale për rrezikun, jo vetëm të ruajë informacionin pasi ngjarja ka ndodhur. Nëse një thikë del nga xhepi në cilindo vend, jo vetëm në shkolla, sistemi jep menjëherë informacion në qendrën e monitorimit.
Nëse një person fshihet gjatë procesit të kërkimit, sistemi e bën të mundur që policia të dijë se nga drejtohet. Nuk mund të ndodhë më ndryshe, sepse sistemi e identifikon makinën përpara se ajo të ndalet dhe informon se ku ndodhet.
Po kështu, historia e dhimbshme e ndalimit të automjeteve në rrugë për kontrolle dhe më pas përplasjet mes policisë dhe drejtuesve të automjeteve nuk do të ndodhë më, sepse sistemi informon qendrën sapo një makinë që nuk ka paguar detyrimet del nga parkimi dhe futet në rrugë, duke sinjalizuar se automjeti ndodhet në qarkullim.
Tani po punohet edhe me një element tjetër, kamerat e trupit, të cilat do të bëjnë që raporti etik mes punonjësit të policisë dhe qytetarit të adresohet në mënyrë sistematike. Kjo nuk do të thotë se nuk do të ndodhin më incidente, por niveli i parandalimit do të rritet në mënyrë eksponenciale dhe rreziqet do të ulen”, u shpreh Rama.
Përveç kamerave të vendosura në rrugë, shkolla dhe zona të tjera publike, projekti parashikon edhe pajisjen e punonjësve të policisë me kamera trupi. Sistemi ngre pikëpyetje mbi nivelin e mbikëqyrjes së qytetarëve dhe mënyrën se si do të ruhen, përdoren dhe kontrollohen të dhënat e mbledhura në kohë reale.
