Shqipëria është vendi i mundësive…nëse ke lidhjet e duhura. Për shembull, nga magazinier dhe pensionist në fshat mund të bëhesh pronari i një koncensioni 60 milionë euro, ndërsa nga shtrues asfalti mund ta gjesh veten në pronar të një kompanie që merr leje për ndërtimin e një parku fotovoltaik me kosto investimi 82 milionë euro.
Skyweb.al sjell më poshtë historinë e përrallore të babë e bir, Hektor dhe Engjëll Agalliu nga Terpani i Beratit, të cilët të dy bashkë kanë në duar 142 milionë euro investime.
Gazetari Klodian Tomorri shkroi sot në Kapitali.al në lidhje me rrugëtimin e çuditshëm të koncensionit të ndërtimit të portit të ri të Vlorës nga njëra kompani në tjetrën, një skemë e njohur kjo edhe për koncensione të tjera në vend, për të përfunduar mëpas në duart e kompanisë Premium Construction & Maintenance me pronar z.Hektor Agalliu.
Gjatë viteve të fundit zoti Agalliu ka punuar si magazinier pranë kompanisë Salillari me pronar Pëllumb Sallarin.
Befas ai e pa veten pronar të një koncesioni 60 milionë euro.
Ndërkoh, Skyweb.al zbulon se Hektor Agalliu është babai i 40-vjeçarit Ëngjëll Agalliu, i cili po ashtu ishte në qendër të vëmendjes së mediave sëfundmi.
Ata janë të afërm të biznesmenit Pëllumb Salillari. Konkretisht, Hektor Agalliu është kunati i z.Salillari.
Ëngjëll Agalliu, i cili më parë ishte punonjës për shtrimin e asfaltit në kompaninë “Salillari” shpk zotëron kompaninë Albania Solar Power, e cila mori pak javë më parë një leje për ndërtimin e një parku fotovoltaik në Boçovë të Fierit.
Parashikohet që kostoja totale vetëm e ndërtimit të shkojë në rreth 82 milionë euro, ndërkohë që kompania është e re dhe rezulton të mos ketë, të paktën në letër, kapacitete për kryerjen e një investimi kaq të madh.
Sipas të dhënave zyrtare, kompania Albania Solar Power, është themeluar në shkurt të vitit 2024 me një kapital fillestar prej vetëm 100 mijë lekësh.
Deri në momentin e aplikimit për këtë projekt gjigant energjetik, nuk ka asnjë aktivitet tjetër të deklaruar, as asete të regjistruara, as bilance financiare të publikuara.
Kjo ngre pikëpyetjen thelbësore: Si mund të marrë një kompani e këtij profili një leje për një investim prej dhjetëra milionë eurosh.
Kalimi dorë më dorë i koncensionit të portit të Vlorës
Në gusht të vitit 2021, pasi qeveria shqiptare i dha për vetëm 1 euro kompanisë “Brunes” portin ekzistues të Vlorës për ta kthyer në resort dhe port jahtesh, shpalli tenderin për ndërtimin e një porti të ri tregtar në zonën e Triportit, ku më parë ndodhej porti i peshkimit.
Tenderi, i zhvilluar në shtator 2021, u fitua nga një bashkim prej 5 kompanish që ofruan ndërtimin me fondet e tyre, ndërsa shteti do t’u kthente 59 milionë euro me këste për 7 vjet. Kontrata u nënshkrua në prill 2022 dhe parashikonte përfundimin e punimeve brenda 36 muajsh.
Në maj 2022, 5 kompanitë krijuan shoqërinë koncesionare “Vlora Harbor Construction and Maintenance”. Vetëm katër muaj më vonë nisi shitja e aksioneve:
- Agbes Constructionshiti 33% për 100 mijë euro.
- Arconstudioshiti 25% për 2.500 euro.
- Bestashiti 30% për 3.000 euro.
Të tria u blenë nga e njëjta kompani: Premium Construction & Maintenance, e cila për vetëm 105.500 euro u bë pronare e 92% të koncesionit prej 60 milionë euro. Sot, ajo dhe ITE Group (8%) janë zotëruese të plotfuqishme të projektit.
Ironikisht, Premium Construction & Maintenance nuk plotësonte asnjë kriter për të marrë pjesë në një kontratë publike të tillë. Ajo u themelua në qershor 2021, dy muaj para tenderit, me kapital 10 mijë lekë dhe aksionar të vetëm Hektor Agalliun, një pensionist nga Dimali që më parë kishte punuar si magazinier në kompaninë “Salillari”. Ai u bë, pa përvojë e pa fuqi financiare, pronar i një prej koncesioneve më të mëdha në vend. /skyweb.al
