Qeveria ka miratuar organizimin e programit “Pas shkolle”, i cili do të zhvillohet jashtë orarit të detyrueshëm mësimor në shkollat publike të arsimit bazë dhe të mesëm.
Programi do t’u ofrohet nxënësve të regjistruar në institucionet publike parauniversitare dhe do të përfshijë veprimtari shtesë pas përfundimit të mësimit.
Vendimi përcakton edhe mënyrën e përzgjedhjes së trajnuesve që do të angazhohen me nxënësit.
Kandidatët do të duhet të aplikojnë sipas kritereve të përcaktuara dhe të dorëzojnë dokumentacionin përkatës, përpara se të kalojnë në procesin e përzgjedhjes.
Programi do të financohet çdo vit nga buxheti i shtetit, përmes fondeve që do t’u kalojnë zyrave vendore të arsimit parauniversitar.
Trajnuesit do të paguhen me 1 mijë lekë për çdo orë të zhvilluar jashtë orarit të detyrueshëm mësimor.
Kjo pagesë do të konsiderohet shpërblim për një shërbim të veçantë arsimor dhe nuk do të jetë pjesë e pagës mujore.
Angazhimi në program nuk do të ndikojë as në ngarkesën e detyrueshme mësimore të mësuesve.
Për vitin shkollor 2026–2027, mësuesit e klasifikuar në portalin “Mësues për Shqipërinë” do të aplikojnë elektronikisht për t’u përfshirë në program.
