Propozimi i Partisë Socialiste për zvogëlimin e numrit të bashkive ka shkaktuar një valë kundërshtimesh në disa qytete të vendit.
Banorët e Memaliajt, Dimalit, Klosit, Prrenjasit, Divjakës, Maliqit dhe Poliçanit kanë dalë në protesta, duke kërkuar që bashkitë e tyre të mos shkrihen me njësitë më të mëdha fqinje.
Në Memaliaj kundërshtohet bashkimi i propozuar me Tepelenën. Qytetarët thonë se zhvendosja e administratës dhe e shërbimeve do t’u shtojë kostot dhe do ta vështirësojë jetën e përditshme.
Në Dimal, banorët protestuan kundër përfshirjes së bashkisë në territorin e Beratit. Ata argumentojnë se zona ka një peshë të rëndësishme bujqësore, shtrirje të gjerë dhe trashëgimi historike që justifikojnë ruajtjen e saj si bashki më vete.
Sipas protestuesve, bashkimi do të krijonte vështirësi veçanërisht për fermerët e Kutallisë, Cukalatit dhe Poshnjës. Kundërshtimi është shoqëruar edhe me një peticion.
Në Klos, qytetarët kërkuan që bashkia të mos bashkohet me Matin, ndërsa administrata vendore ndërpreu për disa orë punën në shenjë proteste.
Edhe në Prrenjas, qindra banorë janë mbledhur për të dytën herë kundër bashkimit të propozuar me Librazhdin, duke deklaruar se do të vazhdojnë të mbrojnë identitetin dhe statusin e bashkisë së tyre.
Protesta u zhvillua edhe në Divjakë, ku kundërshtimeve iu bashkua vetë kryetari socialist i bashkisë, Josif Gorrea.
Ai deklaroi se nuk ishte informuar paraprakisht për planin e bashkimit me Lushnjën dhe se ndihej i tradhtuar nga partia e tij.
Gorrea kundërshtoi edhe argumentin e popullsisë, duke thënë se Divjaka ka rreth 56 mijë banorë të regjistruar dhe rreth 25 mijë banorë sipas censusit.
Administrata e Bashkisë Divjakë ka paralajmëruar bojkotimin e punës, ndërsa qytetarët thonë se protestat do të vazhdojnë deri në tërheqjen e propozimit.
Reagime kundër hartës së re janë shënuar gjithashtu në Maliq dhe Poliçan.
Në të gjitha protestat, kërkesa kryesore është që ndryshimet të mos miratohen pa konsultim me komunitetet që preken drejtpërdrejt.
Harta e paraqitur nga Partia Socialiste mbetet një propozim dhe duhet të kalojë më tej në procesin parlamentar përpara se të marrë formën e një ndarjeje të re administrativo-territoriale. /skyweb.al
