Barnat GLP-1, si Ozempic, mund të ulin rrezikun e frakturave serioze të kockave te njerëzit me diabet të tipit 2, sipas një studimi të madh që sfidon shqetësimet se këto barna shumë të përdorura mund të dëmtojnë shëndetin e kockave.
Studiuesit zbuluan se pacientët që filluan trajtimin me ilaçe GLP-1 kishin një rrezik 21% më të ulët për fraktura nga brishtësia e kockave gjatë një periudhe trevjeçare, krahasuar me pacientë të ngjashëm që merrnin ilaçe të grupit DPP-4, një klasë tjetër barnash për trajtimin e diabetit.
Njerëzit me diabet të tipit 2 kanë një rrezik më të lartë për fraktura të shkaktuara nga trauma me energji të ulët – siç është rrëzimi nga pozicioni në këmbë ose nga një lartësi edhe më e vogël pavarësisht se shpesh kanë densitet normal ose më të lartë të kockave. Sipas studiuesve, kjo mund të jetë për shkak të forcës më të ulët të kockave, dëmtimit të mikroarkitekturës së tyre dhe përshpejtimit të humbjes së masës kockore.
Është me rëndësi që ulja e rrezikut për fraktura ishte e pavarur nga ndryshimet në peshën trupore dhe nivelet e sheqerit në gjak, duke sugjeruar se këto barna mund të kenë një efekt të drejtpërdrejtë mbi kockat.
Këto gjetje bien në kundërshtim me shqetësimet e kahershme se humbja e shpejtë në peshë mund të rrisë rrezikun e frakturave duke ulur densitetin e kockave. Megjithatë, studiuesit theksuan se studimi nuk provon se ilaçet GLP-1 mbrojnë kockat. Meqenëse analiza u bazua në të dhëna shëndetësore vëzhguese dhe jo në një provë klinike të randomizuar, faktorë të tjerë, si aktiviteti fizik, forca muskulore dhe gjendja fillestare e kockave mund të kenë ndikuar në rezultatet.
Studimi gjithashtu nuk gjeti asnjë efekt mbrojtës te personat që merrnin ilaçe GLP-1 pa pasur diabet të tipit 2, gjë që sugjeron se këto rezultate mund të mos vlejnë për njerëzit që i përdorin këto barna vetëm për humbje peshe.
Autorët e studimit theksuan se nevojiten prova klinike prospektive për të përcaktuar nëse ulja e dukshme e rrezikut të frakturave pasqyron vërtet një efekt biologjik të barnave dhe nëse ky efekt vazhdon edhe gjatë trajtimit afatgjatë.
Pas analizimit të të dhënave shëndetësore të më shumë se 133,000 të rriturve, të moshës 50–90 vjeç, me diabet të tipit 2 në Shtetet e Bashkuara gjatë periudhës 2015–2022, studiuesit zbuluan se personat që përdornin ilaçe GLP-1 kishin uljen më të madhe të rrezikut për: frakturat vertebrale (të shtyllës kurrizore) me 32%; frakturat e ijeve ose femurit me 30%.
Këto rezultate sugjerojnë se ilaçet GLP-1 mund të kenë një rol mbrojtës ndaj frakturave te personat me diabet të tipit 2, por ky përfundim duhet të konfirmohet me studime klinike të kontrolluara /skyweb.al
