Shqipëria hap për herë të parë mundësinë që energjia elektrike në bursë të tregtohet edhe me çmim negativ, pas një vendimi të ri të Entit Rregullator të Energjisë.
ERE ka ndryshuar kufirin minimal të lejuar të çmimit në tregun e ditës në avancë të ALPEX, duke e ulur nga 0 euro/MWh në -50 euro/MWh, ndërsa kufiri maksimal mbetet i pandryshuar në +900 euro/MWh.
Kjo do të thotë se në periudha kur prodhimi i energjisë është shumë i lartë dhe kërkesa e ulët, çmimi në tregun me shumicë mund të zbresë nën zero. Pra, në raste të caktuara, prodhuesit mund të pranojnë edhe një çmim negativ për energjinë që hedhin në treg.
Ndryshimi vjen pasi mekanizmi i mëparshëm, me kufi minimal zero, po rezultonte gjithnjë e më pak funksional.
Vetëm nga janari deri më 18 prill 2026, ALPEX regjistroi 13 raste kur çmimi arriti kufirin minimal prej 0 euro/MWh, pa sjellë ndryshim të ofertave nga pjesëmarrësit në bursë.
ERE argumenton se kalimi në -50 euro/MWh është një hap gradual drejt praktikave të bursave europiane, ku çmimet negative janë tashmë pjesë normale e funksionimit të tregut. Kufiri i ri për Shqipërinë është vetëm 10% e nivelit -500 euro/MWh të parashikuar për tregun e bashkuar Shqipëri-Kosovë.
Ndërkohë, tregtia në bursën shqiptare po rritet me ritme të forta. Në katërmujorin e parë të vitit 2026 në zonën shqiptare të ALPEX u tregtuan 470,762 MWh energji, pothuajse dyfishi i 238,368 MWh të së njëjtës periudhë të vitit 2025.
Edhe gjatë vitit 2025, volumi i tregtuar në zonën shqiptare arriti në mbi 1 milion MWh, me një rritje rreth 26% krahasuar me vitin 2024.
Vendimi nuk lidhet me çmimin që paguajnë familjet në faturën mujore, por me çmimin e energjisë në tregun me shumicë, ku prodhuesit dhe tregtarët blejnë dhe shesin energji për ditën pasardhëse. /skyweb.al
