Pas rreth dy dekadash, Shqipëria do të ndërpresë importin e mishit nga Brazili, një prej furnizuesve kryesorë të tregut vendas dhe industrisë së përpunimit.
Mësohet se Ministria e Bujqësisë i ka përcjellë Autoritetit Kombëtar të Ushqimit udhëzimet për mënyrën se si duhet të veprojë me operatorët që importojnë mish nga Brazili, pas ndryshimeve të fundit të miratuara në nivel europian.
Vendimi lidhet me shqetësimet për përdorimin e disa medikamenteve veterinare që shërbejnë për rritjen e masës muskulare të kafshëve, çështje për të cilën ekspertët e vendeve anëtare të Bashkimit Europian kanë mbajtur një qëndrim të përbashkët.
Në shkresën drejtuar AKU-së, Ministria e Bujqësisë sqaron se legjislacioni shqiptar e kushtëzon importin e produkteve me origjinë shtazore me miratimin nga Bashkimi Europian të zonave dhe stabilimenteve të prodhimit.
Për këtë arsye, ndryshimet e bëra me rregulloren e re europiane reflektohen drejtpërdrejt edhe në importet që Shqipëria lejon nga Brazili.
AKU-së i është kërkuar të marrë masat për njoftimin e bizneseve që importojnë mish gjedhi dhe mish shpendësh nga Brazili, ndërsa zbatimi i kufizimeve të reja nis më 3 shtator 2026.
Brazili ka qenë prej vitit 2006 një nga burimet kryesore të mishit të importuar në Shqipëri, veçanërisht për shkak të çmimeve konkurruese dhe sasive të mëdha të disponueshme. Produktet braziliane kanë pasur gjithashtu një peshë të rëndësishme në furnizimin e industrisë së përpunimit të mishit.
Sipas të dhënave të WITS të Bankës Botërore, vetëm gjatë vitit 2024 Shqipëria importoi nga Brazili rreth 28.5 milionë dollarë mish dhe të brendshme, prej të cilave rreth 10.1 milionë dollarë i përkisnin mishit dhe produkteve të kategorisë së shpendëve.
Ndërprerja e importeve pritet të detyrojë importuesit shqiptarë të gjejnë tregje të tjera furnizimi, duke ndryshuar një marrëdhënie tregtare që ka zgjatur për rreth 20 vjet.
